Skjálfti meðal rithöfunda Forlagsins: Vigdís miður sín yfir kápustuldi

Rithöfundurinn Vigdís Grímsdóttir segist „meira en döpur“ vegna kápunnar á bók sinni Elsku drauma mín. Í Fréttablaðinu í gær birtist umfjöllun um bestu og verstu bókakápurnar í jólabókaflóðinu. Glöggur álitsgjafi blaðsins benti á að kápan á bók Vigdísar er nánast alveg eins og veggspjald frá bandarísku hljómsveitinni Lady Danville í tengslum við plötuna Operating. Jón Ásgeir Hreinsson er titlaður sem hönnuður kápunnar.

Líkindi kápunnar og veggspjaldsins eru óumdeilanleg, en elsku Drauma mín er minnigabók Sigríðar Halldórsdóttur, dóttur Halldórs Laxness. Vigdís Grímsdóttir segir stuldinn vera kjaftshögg og spyr á facebook síðu sinni "Hvernig geta menn vogað sér að vinna svona?“

Hún segir jafnframt að hún hafi eingöngu heyrt góða hluti um Jón Ásgeir og segist hafa verið yfir sig glöð þegar hún vissi að hann ætlaði að hanna kápuna.

Aðeins góð reynsla af hönnuðinum

Guðmundur Andri Thorsson rithöfundur er einn þeirra sem leggur orð í belg við stöðuuppfærslu Vigdísar. Hann segir slík vinnubrögð ekki dæmigerð fyrir vinnubrögð við kápugerð og segist sjálfur hafa afar góða reynslu af samstarfi við Jón Ásgeir.

„Þetta er ekki dæmigert fyrir vinnubrögð við kápugerð í bókabransanum, fjarri því. Kápugerðarfólk leggur mikla alúð í verk sitt eins og sést til að mynda á þeim kápum sem tilgreindar eru í þessari umfjöllun Fréttablaðsins. Sjálfur hef ég reynslu af því að vinna með þessum tiltekna hönnuði, sem lét þessi ósköp henda sig, og hef afar góða reynslu af honum; til dæmis gerði hann kápurnar á tvær síðustu skáldsögur mínar - og ég fylgdist með því hvernig hann vann þær frá grunni og sá efniviðinn - þær voru hvor annarri fallegri og frumlegri.“

Sármóðguð fyrir hönd Vigdísar og móður sinnar

Auður Jónsdóttir, dóttir Sigríðar hefur einnig tjáð sig um kápuna á Facebook og segir bókina vera rænda sérstöðu sinni. Það sé „glæpur gagnvart höfundi“. Hún segist sármóðguð fyrir hönd bæði Vígdísar og Sigríðar móður sinnar og fer fram á afsökunarbeiðni.

Jón Ásgeir Hreinsson vildi ekki veita fréttastofu viðtal vegna málsins og vísaði í svar sitt á vef RÚV þar sem hann segir:

„Þarna áttu sér stað mistök af minni hálfu, sem ég harma og biðst afsökunar á,“