Grunaður um aðra nauðgun í Hrísey sama sumar

Eiríkur Fannar Traustason, sem er í hléi frá afplánun á fimm ára dómi fyrir hrottalega nauðgun sautján ára franskrar stúlku í Hrísey sumarið 2015, er grunaður um að hafa nauðgað stúlku undir lögaldri sama sumar. RÚV greinir frá og Vísir hefur fengið fregnirnar staðfestar. Málið er á borði héraðssaksóknara en rannsókn lögreglu á málinu er lokið. Embætti héraðssaksóknara neitaði að tjá sig um málið í samtali við Vísi.

Eiríkur Fannar, sem er þrítugur, hefur gengið laus undanfarnar þrjár vikur þar sem hlé var gert á afplánun hans. Fjallað var um málið á Vísi í gær. Ástæðan var sú að meðganga barnsmóður hans hafði gengið illa og var annað nýfætt barna þeirra í lífshættu um tíma. Það er nú úr lífshættu.

Eiríkur starfaði í Hrísey sumarið 2015 en hin nauðgunin sem hann er sakaður um á að hafa átt sér stað í eyjunni sama sumar. Í þessu tilfelli mun brotaþolinn vera unglingsstúlka að því er fram kemur í frétt RÚV.

Afar fátítt er að hlé sé gert á afplánun fanga hér á landi og ekkert kemur fram í lögum um fullnustu refsinga hve lengi slík hlé geti varið. Það mun vera metið í hverju tilfelli fyrir sig.

Vissi að hún var ein í tjaldinu

Eiríkur Fannar hlaut fimm ára dóm fyrir nauðgun í Hæstarétti í júlí síðastliðnum, eða fyrir um fjórum mánuðum. Hæstiréttur þyngdi dóminn úr héraði þar sem hann fékk fjögur og hálft ár.

Eiríkur neitaði sök í yfirheyrslum hjá lögreglu en játaði brot sitt fyrir dómi. stóð í veitingarekstri í eynni og fékk umrætt kvöld veður af því að stúlkan gisti einsömul í tjaldi á tjaldsvæðinu. Hann sagðist hafa neytt áfengis og kókaíns umrætt kvöld og farið í „blackout“.

Hann sagðist ekki muna eftir að hafa farið á tjaldstæðið eða hafa átt samskipti við stúlkuna umrædda nótt, en áréttaði að hann vefengdi ekki, í ljósi DNA-rannsóknar sem sýndi að sæði hans fannst á stúlkunni, verknaðarlýsingu ákærunnar

Eiríkur rauf með broti sínu skilorð fyrir brot gegn ávana- og fíkniefnalögum. Hæstiréttur taldi að hann ætti sér engar málsbætur. Refsing hans var því þyngd í fimm ára fangelsi auk þess að miskabætur til stúlkunnar voru hækkaðar úr 1,6 milljónum króna í 2,2 milljónir.