Gengur laus fjórum mánuðum eftir fimm ára nauðgunardóm

Kolbeinn Tumi Daðason skrifar 19. október 2016 19:00

Eiríkur braut á konunni á tjaldstæðinu í Hrísey. vísir/friðrik

Eiríkur Fannar Traustason sem fékk fimm ára dóm í Hæstarétti í júlí fyrir því sem aðeins er hægt að lýsa sem hrottafenginni nauðgun í Hrísey í júlí í fyrra er í hléi frá afplánun á dómi sínum. Eiríkur var dæmdur fyrir nauðgun og brot á barnaverndarlögum þegar hann fór inn í tjald sautján ára franskrar stúlku og braut á henni. RÚV greindi fyrst frá.

Samkvæmt heimildum Vísis fékk Eiríkur hlé frá afplánun af persónulegum ástæðum um mánaðarmótin september október. Meðganga konu hans með tvíbura hafði ekki gengið að óskum og var öðru barninu um tíma vart hugað líf. Það er nú úr lífshættu.

Í frétt RÚV er þó fullyrt að Eiríkur sé enn í hléi frá afplánun þremur vikum síðar. Réttargæslumanni stúlkunnar hafi ekki verið gert viðvart og taldi frönsku stúlkunni ekki hafa verið tilkynnt um hléð á afplánun. Hann hafði áður fengið skammtímaleyfi ur fangelsinu.

Aðeins í algerum undantekningartilvikum

Í lögum um fullnustu refsinga segir í 19. grein að hægt sé að gera hlé á afplánun ef mjög sérstakar ástæður mæli með því. Hlé skuli bundið skilyrðum um að aðili gerist ekki brotlegur meðan á því stendur. Þá sé heimilt að setja frekari skilyrði fyrir hléi.

Í greinargerð sem fylgir lögunum er lögð áhersla á að „hlé á afplánun refsingar sé aðeins veit í algerum undantekningartilvikum og þá bundið skilyrðum.“

Fangelsismálastofnun tjáir sig ekki um einstök mál en samkvæmt heimildum Vísis er afar fátítt að samþykkt sé að gert sé hlé á afplánun. Mikil pappírsvinna fylgi því umsóknarferli þar sem gerðar séu alls kyns athuganir og frásögn þeirra sem óska eftir hléi könnuð og staðfest.

Mikill munur er á hléi frá afplánun, þar sem menn ganga einfaldlega lausir í tíma sem ákveðinn er í hverju tilfelli fyrir sig, og skammtímaleyfi þar sem menn geta fengið leyfi í átta klukkustundir vegna t.d. jarðafarar, fæðingar barns eða fleira í þeim dúrnum.

Fékk veður af því að stúlkan væri ein

Eiríkur neitaði sök í yfirheyrslum hjá lögreglu en játaði brot sitt fyrir dómi. stóð í veitingarekstri í eynni og fékk umrætt kvöld veður af því að stúlkan gisti einsömul í tjaldi á tjaldsvæðinu. Hann sagðist hafa neytt áfengis og kókaíns umrætt kvöld og farið í „blackout“.

Hann sagðist ekki muna eftir að hafa farið á tjaldstæðið eða hafa átt samskipti við stúlkuna umrædda nótt, en áréttaði að hann vefengdi ekki, í ljósi DNA-rannsóknar sem sýndi að sæði hans fannst á stúlkunni, verknaðarlýsingu ákærunnar.

Eiríkur rauf með broti sínu skilorð fyrir brot gegn ávana- og fíkniefnalögum. Hæstiréttur taldi að hann ætti sér engar málsbætur. Refsing hans var því þyngd í fimm ára fangelsi auk þess að miskabætur til stúlkunnar voru hækkaðar úr 1,6 milljónum króna í 2,2 milljónir.