Stöðvuðu kannabisræktun í Hafnarfirði sem var einstaklega vel tækjum búin

Lögreglan á höfuðborgarsvæðinu stöðvaði kannabisræktun í iðnaðarhúsnæði á tveimur stöðum í Hafnarfirði í síðustu viku. Á öðrum þeirra var lagt hald á rúmlega 200 kannabisplöntur á ýmsum stigum ræktunar og tvö kíló af marijúana.

Karl á sjötugsaldri, sem var handtekinn á vettvangi, játaði aðild sína að málinu og telst það upplýst. Á hinum staðnum var lagt hald á 15 kannabisplöntur, en þar var ræktunin einstaklega vel tækjum búin og fullkomin eftir því. Karl á fimmtugsaldri játaði aðild sína að seinna málinu, og telst það sömuleiðis upplýst.