Niðurníðsla húsa bönnuð í borginni

Brotnar rúður, veggjakrot, óþrifnaður og flögnuð málning. Þetta gæti verið lýsing á hreysi í verstu hverfum stórborga en á við um tómt verslunar- og þjónustuhúsnæði vítt og breitt um borgina, nálægt heimilum fólks og grunnskólum.

Fréttablaðið fór á stúfana og tók myndir af þessu húsnæði. Í nokkrum tilfellum hefur það staðið autt um margra ára skeið. Í öðrum hefur það verið illa leikið á tveimur til þremur árum. „Borgin gaf út yfirlýsingu vorið 2011 um að niðurníðsla yrði ekki liðin, alveg sama hvar tiltekin hús eða lóðir væru í skipulagsferli. Það yrði beitt sektarákvæðum ef þeirri niðurníðslu yrði ekki kippt í liðinn,“ segir Hjálmar Sveinsson, formaður umhverfis- og skipulagsráðs Reykjavíkurborgar. Hann segir að átakið hafi skilað góðum árangri á sínum tíma. „En ég þekki ekki nákvæmlega hvernig eftirlit með þessum hlutum er skipulagt, nema það er á hreinu að niðurníðsla á ekki að líðast.“

Hann segir eftirlitið að einhverju leyti flókið. Gjaldþrot félaga og yfirstandandi dómsmál geta seinkað afgreiðslu þessara mála. Haft var samband við eigendur Arnarbakka 2 í Breiðholti sem staðfestu að eigendadeilur væru meðal annars orsök þess í hvaða ástandi húsnæðið er. Þar eru hlerar fyrir gluggum og húsið allt hið hrörlegasta.

Að sögn Hjálmars hefur Reykjavíkurborg verið mjög treg til þess undanfarin ár að samþykkja breytingar á deiliskipulagi á þann veg að þjónustuhúsnæði verði að íbúðarhúsnæði. Hann segir að það sé vegna þeirrar stefnu í nýju aðalskipulagi borgarinnar að reyna að gera hverfin sjálfbærari með því að glæða þjónustu inni í hverfunum aftur.

Hann segir að þessir kjarnar, í miðjum íbúðarhverfum, séu ekki áfellisdómur yfir stefnu borgarinnar um blandaða byggð. „Þetta sýnir kannski aðallega að það hefur verið stefna allt of lengi í borginni að hlúa ekki nóg að þessari þjónustu í hverfunum.“ Hjálmar segir uppbyggingu matvöruverslana á Granda vera skipulagsleg mistök. „En nota bene þá virðist þetta vera að breytast saman­ber að Bónus var að opna verslun í Skipholti. Þessir stóru aðilar í lágverðsverslunum virðast vera farnir að fatta að það getur verið góður bisness að reka hverfisverslanir.“

„Það er í stefnu borgarinnar að þétta byggðina, efla hverfin og fjölga í miðlægum hverfum og hverfum sem liggja vel við samgöngum. Ég er ekki í nokkrum vafa um að þessi stefna borgarinnar sem er staðfest í aðalskipulaginu hefur áhrif á fjárfestinguna. Því miður er ekki hægt að segja að þetta gerist allt í einu. Því miður eru ákveðin hverfi þar sem þessi blöndun inni í hverfunum á erfitt uppdráttar,“ segir Hjálmar.