Borgarstjóri setti Sri Chinmoy hlaupið við Tjörnina

Sri Chinmoy heimseiningar Friðarhlaupið hófst í dag með opnunarathöfn við Tjörnina í Reykjavík. Dagur B. Eggertsson borgarstjóri setti hlaupið við friðartré Reykjavíkurborgar, sem gróðursett var árið 2013.

Hlaupið mun standa yfir til 24. júlí og mun tólf manna hópur hlaupa á milli byggða með logandi kyndil. Sá kyndill kallast Friðarkyndillinn og var kveikt á honum í ísgöngunum í Langjökli á mánudag.

Hlaupið fer ekki aðeins fram á Íslandi, heldur í um hundrað löndum, og mun tilgangur þess vera að efla frið, vináttu og skilning manna og menningarheima á milli. Hlaupið var fyrst haldið árið 1987 og hefur Ísland verið með frá upphafi.

Við opnunarathöfnina var meðal annars haldin friðarstund og kyndillinn látinn ganga manna á milli, þar á meðal fulltrúa allra heimsálfanna í táknrænni athöfn. 

Sri Chinmoy, stofnandi hlaupsins, var indverskur tónlistarmaður, gúrú og kraftlyftingamaður sem lést árið 2007. Hann nýtur talsverðra vinsælda hér á landi og fyrir stuttu óskaði Sri Chinmoy-miðstöðin eftir því að fá að reisa þrettán metra háa styttu af gúrunum við Esjurætur.