Tjölduðu í 30 gráðu frosti: „Eins og að draga sleða í sykri“

Reikna er með því að leiðangri Einars Torfa Finnssonar, leiðsögumanns og eins eigenda Íslenskra fjallaleiðsögumanna, á Suðurpólinn ljúki síðdegis á morgun. Einar Torfi fer fyrir fjögurra manna hópi sem verið hefur á göngu frá því síðari hluta nóvember.

Á bloggsíðu sem hópurinn heldur úti kemur fram að gærdagurinn hafi verið sérstaklega kaldur.

„Grímurnar okkar frusu fastar við andlitið en venjulega og við fundum á höndum okkar hve kalt var,“ segir Einar á bloggsíðunni. Þrátt fyrir erfiðar aðstæður hafi þeir náð að ferðast rúma 22 kílómetra en dagurinn hafi verið einn sá erfiðasti á tveggja mánaða ferðalagi.

Sjá einnig:Grét og hló þegar hún kom á Suðurpólinn

„Þegar við tjölduðum var 30 gráðu frost og tíu hnúta vindur (um 5 m/s). Aðstæður tl að skíða voru hrikalegar. Þetta var eins og að draga sleða í sykri,“ segir Einar Torfi. Hann hefur verið leiðsögumaður frá 1984. Heildarleiðin á Suðurpólinn er alls 1130 kílómetrar með 2.835 metra hækkun.

Einar Torfi er leiðsögumaður í hópnum en nýsjálensk ferðaskrifstofa skipulagði leiðangurinn og falaðist eftir þjónustu Íslenskra fjallaleiðsögumanna.

„Það var leitað til okkar vegna þeirrar reynslu sem við höfum. Íslenskir fjallaleiðsögumenn hafa lengi boðið upp á gönguskíðaleiðangra yfir Sprengisand og Vatnajökul og yfir Grænlandsjökul. Við erum núna að bjóða sjálfir upp á leiðangra á Norður- og Suðurpólinn, bæði síðustu gráðuna og alla leið,“ sagði Björgvin Hilmarsson, leiðsögumaður og umsjónarmaður leiðangra, í viðtali við Fréttablaðið á Þorkláksmessu.