Heppin að ekki komu upp alvarlegri atvik

Félagsmálaráðherra segir að þakka megi fyrir að ekki hafi alvarlegri atvik komið upp í ferðaþjónustu fatlaðra, miðað við þann fjölda mistaka sem tilkynnt hafi verið til ráðuneytisins. Hún muni fylgjast vel með störfum nýskipaðrar neyðarstjórnar á höfuðborgarsvæðinu og hugsanlega þurfi að setja lög til að efla eftirlit með þjónustu sem þessari.

Eygló Harðardóttir félagsmálaráðherra hefur áhyggjur af stöðu þessara mála og fékk borgarstjórann í Reykjavík, bæjarstjórann í Hafnarfirði og fulltrúa Þroskahjálpar á fund sinn í dag til að ræða þessi mál.

„Við höfum haft áhyggjur af stöðunni um hríð. Við höfum fengið fjölmargar ábendingar í gegnum réttindagæsluna um að hlutirnir hafi einfaldlega ekki verið í lagi,“ segir Eygló.

Á fundi ráðherra með borgarstjóra í dag fór hann yfir þær áætlanir sem sveitarfélögin fimm sem standa að Strætó samþykktu í gær með stofnun neyðarstjórnar fyrir þjónustuna við fatlaða. Hún hefur einnig farið yfir málin með velferðanefnd Alþingis, formanni þroskahjálpar og síðdegis kom Haraldur Líndal bæjarstjóri í Hafnarfirði á fund ráðherra. Eygló ætlar síðan að hitta oddvita hinna sveitarfélaganna eftir helgi og fylgjast náið með þróun mála.

„Ég held að þarna séu menn að horfast í augu við það hversu alvarleg staðan er. Það lýsir sér náttúrlega í því að hér er búið að skipa neyðarstjórn og menn eru að grípa til aðgerða. Við munum fylgjast með þessum aðgerðum og munum senda formlegt erindi með þeim ábendingum sem við höfum fengið. Óska eftir skriflegum svörum og óskum eftir því að við séum reglulega upplýst um hvernig gengur að koma á þessum umbótum,“ segir félagsmálaráðherra.

Eygló segir þau mistök sem gerð hafi verið að undanförnu, þegar til stóð að bæta þjónustuna, hafi verið alvarleg.

„Ég held að við getum verið þakklát fyrir það að ekki skuli ekki hafa komið upp ennþá alvarlegri atvik. Þau hafa verið nógu alvarleg og nú þurfum við að vinna í því saman að tryggja að þetta gerist ekki aftur,“ segir Eygló.

Þá fylgist ráðuneytið með þessum málum utan höfuðborgarsvæðisins þar sem telji að víða megi bæta úr þótt sveitarstjórnarmenn reyni stöðugt að gera betur.

„Hvað snýr að okkur hér í ráðuneytinu, að þá munum við fara yfir það sem er að gerast og síðan skoða í framhaldinu hvort nauðsynlegt sé að grípa þá til einhverra lagabreytinga til að tryggja að eftirlit með hlutunum sé með betri hætti en hefur verið," segir Eygló Harðardóttir.