Hútar hraktir frá stærstu flugherstöð Jemen

Hersveitir á bandi Jemenstjórnar hafa náð stærstu flugherstöð landsins aftur á sitt vald eftir harða bardaga við uppreisnarmenn Húta.

BBC greinir frá því að mikið mannfall hafi orðið síðustu daga í bardögum um flugherstöðina al-Anad, norður af hafnarborginni Aden.

Hútar voru hraktir frá Adenborg í síðasta mánuði en stjórnarher landsins hefur notið aðstoðar Sáda sem hafa gert fjölda loftárása á stöðvar Húta.

Al-Anad var áður notuð af Bandaríkjaher, þaðan sem herinn stýrði drónaárásum sínum á hryðjuverkasamtökin al-Qaeda.

Hútar hafa náð höfuðborginni Sana‘a og stórum landsvæðum á sitt vald síðasta árið og hefur forseti landsins, Abdrabbo Mansour Hadi, neyðst til að flýja land.

Uppreisnarmenn Húta njóta stuðnings sveita sem styðja fyrrum forsetann Ali Abdullah Saleh, og segjast berjast gegn spillingu í landinu.