Óttarr sá eini sem hefur skilað inn framboði til formanns

Óttarr Proppé er sá eini sem hefur skilað inn framboði til formanns flokksins. Guðlaug Kristjánsdóttir, forseti bæjarstjórnar í Hafnarfirði, sem orðuð hafði verið við embættið tók þá ákvörðun í vikunni að bjóða sig fram til stjórnarformanns.

„Ég hafði gefið upp að ég hygðist bjóða mig fram til forystu í flokknum og var þá að líta til þessara tveggja embætta. En ég hafði ekki ákveðið mig en gerði það nú á miðvikudag og skilaði þá inn formlegu framboði,“ útskýrir Guðlaug í samtali við Vísi.

Fjórir eru því í framboði til stjórnarformanns en það eru auk Guðlaugar Brynhildur S. Björnsdóttir, Matthías Freyr Matthíasson og Preben Pétursson.

Framboðsfrestur rennur ekki út fyrr en ársfundur flokksins hefst á morgun klukkan 11 en ólíklegt þykir að nokkur bjóði sig fram á móti Óttarri.