Bandarískir hermenn drápu tvo saklausa gísla

Barátta Bandaríkjanna gegn hryðjuverkum dró tvo saklausa gísla til dauða í janúar. Aðgerðin var hluti af yfirstandandi baráttu Bandaríkjanna gegn al Qaeda.

CNN greinir frá því að gíslarnir hafi látist þegar dróni frá Bandaríkjunum skaut á búðir al Qaeda. Barack Obama, Bandaríkjaforseti, tilkynnti þetta á blaðamannafundi í dag. Sagðist hann taka fulla ábyrgð á atburðunum og baðst afsökunar fyrir hönd ríkisstjórnar sinnar.

Í aðgerðinni dó einnig leiðtogi al Qaeda, Ahmed Farouq, amerískur borgari. Yfirvöld í Bandaríkjunum sögðust ekki hafa haft neina ástæðu til þess að ætla að gíslarnir væru staðsettir í búðunum sem þeir miðuðu á.

Mennirnir sem létust í árásinni hétu Warren Weinstein og Giovanni Lo Porto. Weinstein var amerískur verktaki sem hafði verið í haldi al Qaeda síðan í ágúst árið 2011. Lo Porto var Ítali sem hafði verið í haldi samtakanna síðan árið 2012.

Trúnaður ríkti um upplýsingarnar þangað til í dag. Obama sagðist trúa því „að það sé mikilvægt að veita Bandaríkjamönnum eins miklar upplýsingar og hægt er um aðgerðir okkar gegn hryðjuverkum, sérstaklega þegar þær aðgerðir valda dauða samborgara okkar.“