Telur líklegt að af verkfalli verði

Björn Snæbjörnsson, formaður Starfsgreinasambandsins, á ekki von á öðru en að verkfallsaðgerðir verði samþykktar af félagsmönnum. Kosningu um verkfall lauk á miðnætti hjá félagsmönnum innan Starfsgreinasambandsins og mun sambandið kynna niðurstöður kosninganna klukkan 11 í dag.

„Ég get ekki trúað öðru en að kosningin verði afgerandi hjá okkar fólki og að verkfallsaðgerðir verði samþykktar,“ segir Björn. „Fyrstu verkföllin okkar munu þá bresta á þann 30. apríl næstkomandi.“

Björn segir þetta verkfall geta haft miklar afleiðingar í för með sér og að ferðaþjónustan gæti misst spón úr aski sínum. „Það eru flest allir sem munu finna fyrir fyrstu verkfallsaðgerðum okkar. Þetta eru ræstingafólk og fólk í fiskvinnslu og kjötiðnaðarstöðvum svo dæmi sé tekið. Einnig er um að ræða einstaklinga í ferðaþjónustu sem og á veitingastöðum.“