Eden rís úr öskunni á Tívolílóð í Hveragerði

Bæjarráð Hveragerðis hefur samþykkt að veita félagi sem hyggst byggja söluskála undir nafni Eden fimm mánaða forgang að svokallaðri Tívolílóð.

Gróðrarstöðin og veitingaskálinn Eden brann til kaldra kola fyrir fjórum árum, þann 22. júlí 2011, og lauk þar langri sögu þessa vinsæla söluskála.

Að því er fram kemur í erindi til bæjaryfirvalda í Hveragerði er nú hafinn undirbúningur að uppbyggingu og rekstri fjölnota húss í Hveragerði undir merkjum Eden Geothermal Centre. Rekstrarfélagið Eden ehf. hyggist standa fyrir rekstri á fjölnota byggingu í Hveragerði og hafi í því sambandi undirritað viljayfirlýsingu um byggingu og leigu á slíku húsi. Byggingin verði allt að 2.500 fermetrar, þar af átta hundruð fermetra „tropical“ gróðurhús.

Segir í bréfinu að miðað sé við að húsið verði tilbúið til opnunar í apríl 2017. „Reiknað er með að í húsinu verði unnin allt að 100 ársverk,“ segir um umfang rekstursins.

Þá segir að forsenda fyrir því að verkefnið verði að veruleika sé að Hveragerðisbær veiti fimm mánaða forkaupsrétt á Tívolíreitnum. „Jafnframt er óskað eftir því að félagið fá leyfi Hveragerðisbæjar til að nota nafnið Eden á starfsemina enda verði starfsemin í samræmi við starfsemi sem áður var í Eden,“ segir í erindinu.

Bæjarráðið segir þessi áform samræmast vel þeim hugmyndum sem margir bæjarbúar og bæjarstjórn hafi haft um enduruppbyggingu Eden í bæjarfélaginu. Undirbúningshópnum sé veittur forgangur að Tívolíreitnum í fimm mánuði.

„Verði hugmyndir þeirra að veruleika í þeirri mynd sem þær eru hér settar fram er bæjarráð tilbúið til að veita heimild til notkunar á Eden nafninu fyrir starfsemina,“ segir bæjarráðið í samþykkt sinni.