Skordýraeitur undir mörkum

Mælingar á illgresiseyðum, skordýraeitri og öðrum varnarefnum í matvælum í Evrópusambandinu, Íslandi og Noregi sýndu að langflest, eða um 97 prósent matvæla, voru með varnarefnaleifar undir leyfilegum mörkum.

Þetta kemur fram í niðurstöðu samræmdrar eftirlitsáætlunar Evrópusambandsins sem Ísland tekur þátt í. Á Íslandi voru tekin 242 sýni af ávöxtum og grænmeti árið 2013, bæði af innlendri afurð og innfluttum. Í heildina voru tekin 81.000 sýni í 29 ríkjum.

Á Íslandi voru um 98 prósent sýna sem voru með varnarefnaleifar undir leyfilegum mörkum og 55,4 prósent sýna innihéldu engar leifar.

Þessar mælingar eru svipaðar og aðrar mælingar í Evrópu og þykja niðurstöðurnar sýna fram á að samræmdar og skýrar reglur innan Evrópusambandsins um notkun plöntuvarnarefna séu að auka öryggi neytenda.