„Ef samstaða næst ekki, þá leggst byggð líklega af í eynni“

Boðað hefur verið til íbúafundar í Grímsey þann 28. janúar næstkomandi til að ræða framtíð byggðarinnar í eynni. Staða áframhaldandi byggðar er óviss þar sem útgerðaraðilar eru í greiðsluvandræðum og gætu þurft að selja frá sér aflaheimildir til þess að standa í skilum við fjármálastofnanir.

Sjá einnig: Óvissa um framtíð byggðar í Grímsey

Gunnar Hannesson, útgerðarmaður í Grímsey, telur að íþyngjandi aðgerðir Íslandsbanka geti endað byggð í eynni. „Það er alveg ljóst að þeir vilja fá borgað. Við erum að berjast við vanda sem varð til í hruninu og því er þetta afar erfitt. Við eigum fyrir skuldum og vel það, það er ekki málið, en Íslandsbanki vill fara að fá greitt og vill að við seljum. Ef enginn er kvótinn í eynni þá verður engin byggð heldur í eynni,“ segir Gunnar.

Að mati Gunnars mun framtíð byggðar í Grímsey verða rædd á íbúafundi sem er boðaður þann 28. janúar. „Þá mun þetta allt verða orðið ljóst, bærinn mun koma á fundinn og sjá til hvað hægt er að gera.“

Þóroddur Bjarnason, formaður stjórnar Byggðastofnunar, telur stöðuna sem upp er komin varðandi kvótamál í Grímsey alvarlega. „Lítil sjávarþorp sem byggja alfarið á sjávarútvegi hafa átt undir högg að sækja. Aflamark Byggðastofnunar miðar sérstaklega að því að styðja við slík bæjarfélög í samvinnu við útgerðaraðila, vinnslu og samfélagið. Tíu sveitarfélög falla undir skilgreiningar Byggðastofnunar og hefur stofnunin verið með sértækan byggðakvóta í tíu þeirra. Grímsey hefur ekki þurft á aðstoð að halda vegna ágætrar stöðu útgerðar og vinnslu en nú er önnur staða uppi. Nú þarf Byggðastofnun að skoða hvort hún geti komið að lausninni, en það aflamark verður aldrei eina lausnin. Það verður aldrei hægt að reka útgerð á aflamarki Byggðastofnunar einvörðungu,“ segir Þóroddur. 

„Grímsey á sér langa sögu, byggð hefur verið í eynni í um 800 ár og það yrði hörmulegt ef hún endar svona, með að útgerð leggist af og byggðin þar af leiðandi líka.“„Það er hægt að viðhalda byggð í Grímsey ef allir leggjast á árarnar og hjálpast að; útgerðarmenn, íbúar, fjármálastofnanir og landshlutasamtök. Ef samstaða næst ekki, þá leggst byggð líklega af í eynni.“ 

Guðmundur Baldvin Guðmundsson, formaður bæjarráðs Akureyrarkaupstaðar, segir bæjaryfirvöld róa öllum árum að því að viðhalda byggð í eynni. „Það yrði dapurlegt ef byggð legðist af í Grímsey. Við erum nú að vinna að því að finna lausnir með Byggðastofnun og Atvinnuþróunarfélagi Eyjafjarðar. Það er keppikefli okkar að áfram verði byggð í Grímsey.