Býst við að viðgerð á Djúpvegi klárist klukkan átta

Sverrir Guðbrandsson, verkstjóri Vegagerðarinnar á Hólmavík, segir að áætlað sé að viðgerð á kaflanum suður af Hólmavík klárist um klukkan 20 í kvöld. Þetta var haft eftir Sverri um 17:30 fyrr í dag. „Þetta er í áttina. Upphaflega gerðum við ráð fyrir að þetta myndi klárast um klukkan 18 en það mun eitthvað tefjast eins og verða vill.“

Kaflinn sem um ræðir er á Djúpvegi, númer 61, og er um 700 metrum suður af Hólmavík. Sverrir segir að um tíu manns séu að störfum, bæði starfsmenn Vegagerðarinnar og verktakar. Viðgerðin hófst um klukkan 21 í gærkvöldi og hefur verið unnið stanslaust síðan.

Nemendurnir sextíu og bílstjórinn sem sátu föst í rútu í Staðardal í nótt hafast nú við í fjöldahjálparstöð Rauða krossins sem opnuð var í félagsheimilinu á Hólmavík um hádegisbil fyrr í dag. Ungmennin voru í rúmar tólf klukkustundir í rútunni eftir að vegurinn sunnan Hólmavíkur fór í sundur í vatnavöxtum.

Nemendurnir eru allir á unglingastigi í Fjölbrautaskólanum á Sauðárkróki en þeir voru nú um helgina í vinaskólaheimsókn í Menntaskólanum á Ísafirði. Rútan var á leið til Hólmavíkur frá Ísafirði seint í gærkvöld en festist fremst í Staðardal norðan Hólmavíkur þar sem vegurinn hafði rofnað. Ekki þótti hættandi á björgunaraðgerðir í nótt og höfðust ungmennin við í rútunni en það þótti öruggasti kosturinn.

Í spilaranum að ofan má sjá myndband af aðstæðum á vettvangi sem Jón Halldórsson tók.