Jusu sjó úr bátnum í þrjá tíma: „Erum ennþá að jafna okkur í fótunum“

„Þetta fer í reynslubankann,“ segir Jóhann Guðni Jóhannsson, skipverji á togaranum Ásbirni sem leki kom að undan Vestfjarðarmiðum í gærmorgun. Björgunarskip Landsbjargar var sent út frá Ísafirði til aðstoðar en þangað til það kom máttu áhafnarmeðlimir hafa sig alla við að ausa sjó úr skipinu í fötum.

„Við vorum á togi vestan við Hala og allt í einu hringir stýrimaðurinn og segir að við þurfum að hífa, það sé byrjað að leka,“ segir Jóhann. „Við hífum og svo er okkur sagt að fara niður í vélarrými að bera þaðan sjó.“

Dælurnar tvær á bátnum dugðu ekki til að dæla út sjónum, svo hratt flæddi inn. Til að koma í veg fyrir að tækjabúnaður í vélarrýminu skemmdist þurftu Jóhann og níu aðrir skipverjar að bera fullar fötur af sjó úr vélarrýminu og upp á dekk í um þrjár klukkustundir.

„Við hættum þegar björgunarskipið kom með aðra dælu,“ segir Jóhann.

Stórt gat kom á bátinn beint undir vélinni en að sögn Jóhanns er ekki vitað hvernig það gerðist. Á Ísafirði gerðu kafarar tímabundið við gatið og lagt var af stað suður til Reykjavíkur í gær. Jóhann og félagar komu svo heim eftir hádegi í dag.

„Við vorum alveg gjörsamlega búnir á því, þetta var ótrúlegt,“ segir hann. „Við erum bara ennþá að jafna okkur í fótunum eftir þetta.“

Ásbjörn fer í slippinn í fyrramálið og segir Jóhann að lagt verði af stað aftur þegar búið er að laga hann.