Norðmaðurinn sendur heim

Norðmaður um fimmtugt, sem stöðvaður var af tollgæslu og lögreglu við komuna til Ísland í gær ásamt íslenskum vini sínum, heldur af landi brott í dag. Þetta staðfestir Vilhjálmur Þórhallsson, löglærður fulltrúi lögreglustjóra, í samtali við Vísi. Ákvörðunin sé tekin á grundvelli Útlendingalaga og er vísað til allsherjarreglu og almannaöryggis. Maðurinn átti bókað flug aftur til Noregs á föstudag.

Maðurinn er talinn tilheyra mótorhjólasamtökunum Devil's Choice sem eru opinber stuðningssamtök Hells Angels. Vísir fjallaði um málið í morgun en lögmaður mannsins, Guðmundur St. Ragnarsson, segir að maðurinn sé ekki á sakaskrá í Noregi. Sömuleiðis hafi hann ferðast til annarra Evrópulanda án vandræða.

Vilhjálmur segir í samtali við Vísi að maðurinn sé talinn hafa tengsl við skipulagða glæpastarfsemi. Á þeim grundvelli sé maðurinn tekinn til hliðar á grundvelli Útlendingalaga en þar segir að heimilt sé að vísa EES eða EFTA borgara úr landi við komu til landsins eða allt að sjö sólarhringum eftir komu þeirra vegna almannaöryggis.

Mega yfirgefa landið hvenær sem er

Maðurinn hefur verið vistaður í opnum fangaklefa hjá Lögreglunni á Suðurnesjum þar sem engin aðstaða er til þess á landamærunum. Klefi hans er því opinn og getur hann farið á salerni og reykt sígarettur kjósi hann að gera það enda ekki um handtöku að ræða. Sömuleiðis sé honum frjálst að yfirgefa landið þegar hann vilji. Það gildi almennt um þá sem stöðvaðir séu á landamærunum.

Devil's Choice voru með íslenskt útibú um tíma og var til umfjöllunar þegar níu Norðmenn voru stöðvaðir á Keflavíkurflugvelli í október 2013. Í kjölfar fjölmiðlaumfjöllunar sagðist formaður samtakanna hér á landi að samtökin ætluðu að leita réttar síns. Búið væri að taka þau af lífi án dóms og laga.

Aðspurður hvort mál sem þessi kæmu reglulega upp á borð Lögreglunnar á Suðurnesjum sagði hann að svo væri. Síðan í október 2013 hefðu eitt og eitt komið upp en hann hefði þó ekki tölu á þeim.