Breyta kynlífsklúbb í kirkju

Eigendur kynlífsklúbbs í Nashville í Bandaríkjunum hafa breytt klúbbnum í trúfélag og húsinu í kirkju. Nágrannar klúbbsins, þar á meðal kristinn skóli, höfðu komið í veg fyrir opnun hans í nóvember.

Staðurinn sem hét áður Social Club, heitir nú United Fellowship Center. Á teikningum hússins má sjá hvernig eitt herbergið sem áður hét „Dýflissa“ er nú titlað „Kór“. Í samtali við AP fréttaveituna segir Larry Roberts, lögmaður eigenda klúbbsins, að kynlíf muni ekki eiga sér stað í kirkjunni.

Embættismenn í Nashville segja að ekki sé hægt að koma í veg fyrir opnun staðarins, en verði starfsemin þarna ekki tengd trúarstarfsemi verði honum lokað.

Í samtali við héraðsmiðilinn Tennessean segir Karen Bennett, borgarfulltrúi, að andstæðingar klúbbsins muni skoða „kirkjuna“ þegar hún opni.

„Það eina sem þeir gerðu var að breyta nöfnum herbergja.“