Enn varað við norsku eldiskyni

Landssamband stangaveiðifélaga (LS) hefur sent Sigurði Inga Jóhannssyni, sjávarútvegs- og landbúnaðarráðherra, bréf þar sem sterklega er varað við eldi á norskum laxi í sjókvíum við landið. Eins er áhyggjum lýst af fyrirhuguðu laxeldi í Ísafjarðardjúpi og í Eyjafirði.

Fyrr hafði Landssamband veiðifélaga sent ráðherra bréf sem efnislega fjallar um það sama og vísað til samkomulags frá október 1988 sem stjórnvöld og allir hagsmunaaðilar stóðu að með undirritun sinni. Þar var notkun á norsku eldiskyni útilokuð. LS var aðili að samkomulaginu og tekur undir allar kröfur LV; Eyjafirði og Ísafjarðardjúpi verði lokað fyrir eldi á laxi af norskum uppruna.

„Með lokun þeirra svæða sem að framan greinir fyrir eldi á frjóum norskum laxi er stigið skref í þá átt að vernda íslenska laxastofna. Sú skylda hvílir lögum samkvæmt einnig á stjórnvöldum,“ segir í bréfi LS.