Hæstiréttur á að endurspegla samfélagið

Þórhildur Þorkelsdóttir skrifar 26. september 2015 20:00

Ólöf Nordal, innanríkisráðherra, segir tilefni til að endurskoða reglur um skipan dómara hér á landi. Skipan dómara í vikunni varpi ljósi á veikleika núverandi fyrirkomulags. Mikilvægt sé að líta til þess sjónarmiðs að hæstiréttur enduspegli þjóðfélagið.

Skipan hæstaréttardómara í vikunni hefur verið mikið í umræðunni, ekki síst vegna jafnréttissjónarmiða en hér á landi er aðeins ein kona starfandi hæstaréttardómari á móti átta körlum. Sérstök hæfnisnefnd sem starfað hefur samkvæmt lögum frá 2010 lagði til að Karl Axelsson, starfandi hæstaréttardómari yrði skipaður dómari en einnig sóttu um stöðuna Ingveldur Einarsdóttir og Davíð Þór Björgvinsson. Gagnrýnt hefur verið að hæfnisnefndin sé einungis skipuð karlmönnum.

„Ég held að það sé mikilvægt að menn taki tillit til þess sjónarmiðs að Hæstiréttur endurspegli samfélagið. Ég tel að málið gefi tilefni til þess að skoða þetta. Málið varpar ljósi á veikleikana á þessu fyrirkomulagi og það er skylda mín að skoða það,“ segir Ólöf.

Mat nefndarinnar um að hún sé undanþegin jafnréttislögum hefur einnig verið gagnrýnt töluvert, meðal annars af félagi kvenna í lögmennsku og fyrrverandi hæstaréttardómara. Ráðherra getur hunsað mat nefndarinnar og lagt til að kona verði ráðinn í staðinn en þarf þá stuðning alþingis við skipan dómarans. Ólöf segist ekki hafa tekið ákvörðun um hvort það verði gert.

„Ég held að það sé hafið yfir allan vafa að það var vilji löggjafans á þeim tíma sem jafnréttisögin voru sett að þau skyldu gilda fyrir alla. Ég horfi til framtíðar varðandi málið, það skiptir miklu máli að það sé ró um þetta mál. Og ég held að við eigum að taka það með okkur úr því sem hjálpar okkur til framtíðar,“ segir Ólöf Nordal innanríkisráðherra.

Mest lesið

Fleiri fréttir