Kosningar um aðildina að ESB

Bretland Elísabet Bretadrottning flutti í gær hina árlegu stefnuræðu bresku stjórnarinnar. Þar komu fram helstu stefnumál hinnar nýju ríkisstjórnar Íhaldsflokksins, sem náði hreinum þingmeirihluta í kosningunum í síðasta mánuði.

David Cameron forsætisráðherra hyggst efna til þjóðaratkvæðagreiðslu um aðild Bretlands að Evrópusambandinu fyrir árslok 2017. Lög um þetta verða kynnt fljótlega, segir í stefnuræðunni, og talið er að það muni gerast strax í dag.

Jafnframt hyggst Cameron hefja viðræður við Evrópusambandið um breytingar á aðildarskilmálum Bretlands, ásamt því að þrýsta á um að gerðar verði umbætur á Evrópusambandinu.

Strax í næsta mánuði ætlar Cameron að ræða við leiðtoga allra Evrópusambandsríkjanna til að kynna þeim hugmyndir sínar, og vonast til þess að geta borið hinn breytta aðildarsamning undir bresku þjóðina. Hann hefur áður sagst vona að samningurinn verði það góður að Bretar geti samþykkt hann.

Fjölmörg önnur stefnumál stjórnarinnar voru kynnt í ræðunni, þar á meðal áform um að veita Skotlandi, Wales og Norður-Írlandi aukin völd. Þar má búast við að Skoski þjóðarflokkurinn, sem vann gríðarmikinn sigur í þingkosningunum, geri kröfur um mun meiri breytingar en að hefur verið stefnt.

Eitt kosningaloforða Camerons fær ekki mikið vægi í ræðunni, en það eru áform íhaldsmanna um að ógilda bresku mannréttindalögin. Á hinn bóginn eru boðaðar breytingar á fjarskiptalögum sem að öllum líkindum eiga að snúast um auknar heimildir leyniþjónustunnar til að fylgjast með farsímanotkun og jafnvel netsamskiptum fólks.

Samkvæmt fornri venju er það drottningin sem les upp stefnuræðu stjórnarinnar ár hvert, jafnan að vori til þegar þingárið hefst. Uppistaðan í ræðunni er venju samkvæmt listi yfir þau frumvörp sem stjórnin hyggst leggja fram næsta árið, þangað til þingi er slitið.

Ýmsar serimóníur fylgja jafnan þessum ræðuflutningi drottningarinnar. Þannig er þess vandlega gætt að fulltrúar í neðri málstofu þingsins komi síðastir allra inn í þingsal lávarðadeildarinnar og þurfa þeir að standa aftast í salnum, aftan við lávarðana og aðra tignargesti drottningar.