Molotov-málið: Dæmdir fyrir árás á fulltrúa lögreglustjórans

Dómur var kveðinn upp í Molotov-málinu svokallaða í Héraðsdómi Norðurlands eystra í gær. Þrír menn voru ákærðir í málinu. Var tveimur þeirra gefið að sök að hafa að undirlagi þriðja mannsins haft í hótunum við fulltrúa lögreglustjórans á Akureyri, Eyþór Þorbergsson, og kveikt í bíl hans aðfaranótt 12. nóvember í fyrra.

Tómas Helgi Jónsson var dæmdur í þriggja og hálfs árs fangelsi fyrir að hafa veist að Eyþóri með ofbeldi á heimili hans. Tómas fór grímuklæddur heim til Eyþórs og sló í handlegg hans með átaksskafti þegar sýslumannsfulltrúinn opnaði útidyrahurðina á heimili sína. Hlaut Eyþór maráverka á vinstri handlegg og litla fingri vinstri handar. Þá var Tómas jafnframt dæmdur fyrir að hafa kveikt í bíl sýslumannsfulltrúans með molotov-kokteil.

Auk þessa var Tómas dæmdur fyrir tilraun til fjárkúgunar ásamt tveimur öðrum, manni og konu. Fóru þau heim til aldraðs bónda í Þingeyjarsveit í apríl í fyrra, höfðu í hótunum við hann, stálu greiðslukorti hans og reyndu að millifæra eina milljón króna af bankareikningi hans.

Lofaði Reyni og Tómasi allt að hálfri milljón fyrir að veitast að fulltrúanum

Reynir Örn Viðarsson var dæmdur í tveggja ára fangelsi en 21 mánuður er skilorðsbundinn til þriggja ára. Honum var gefið að sök að hafa ekið Tómasi Helga í nágrenni við heimili Eyþórs og síðan vaktað lögreglustöðin á Akureyri ef til þess kæmi að lögreglan yrði kölluð út. Hann var jafnframt sakfelldur fyrir að hafa kveikt í bílnum ásamt Tómasi. Fram kemur í dómnum að Tómas hafi að mestu leyti játað brot sín og Reynir hafi játað þau skýlaust.

Þriðji maðurinn sem ákærður var í Molotov-málinu, Garðar Hallgrímsson, var dæmdur í fangelsi í tvö og hálft ár en til frádráttar kom ellefu daga gæsluvarðhaldsvist hans. Garðar var ákærður fyirr að hafa lofað Tómasi og Reyni greiðslu allt að hálfri milljón króna fyrir að fara heim til Eyþórs og veitast að honum en hann var sagður ósáttur við afgreiðslu fulltrúans á sakamálum gegn honum.

Reikull og í heild sinni ótrúverðugur framburður

Garðar neitaði alfarið sök í málinu en að mati dómsins voru framburðir Tómasar og Reynis um málið stöðugir og samhljóða „og ennfremur í öllum aðalatriðum í samræmi við þær skýrslur sem þeir gáfu hjá lögreglu.  Þeir hafa borið að fyrir áeggjan meðákærða Garðars og vegna áður lýstra aðstæðna hefðu þeir veist að fulltrúa lögreglustjóra í greint sinn.“

Frásögn Tómasar og Reynis á sér einnig nokkra stoð í frásögnum vitna „en einnig öðrum gögnum og þar á meðal um að ákærði Garðar hafi borið þungan hug til fulltrúans.  Aftur á móti hefur frásögn ákærða Garðars um að meðákærðu hafi borið slíkan hug til fulltrúans enga stoð í gögnum málsins.  Verður frásögn hans að því leyti metin sem fyrirsláttur. Að áliti dómsins hefur framburður Garðars við meðferð málsins að öðru leyti verið reikull og í heild ótrúverðugur.“

Garðar var því fundinn sekur, þrátt fyrir að hafa alfarið neitað sök.

Dóminn í heild sinni má lesa hér.