Vill körfurólu af skólalóð

Sjö ára drengur tognaði í baki þegar svokölluð körfuróla, sem sex önnur börn sátu í, lenti á honum þegar hann var að leik á skólalóð fyrir skemmstu. Móðir drengsins telur mikla slysahættu vera af rólum af þessum toga og vill að þær verði fjarlægðar af skólalóðum grunn- og leikskóla.

Í gær greindum við frá því að svokallaðar körfurólur hafi valdið tveimur alvarlegum slysum hér á landi að undanförnu. Samskonar slys hafa einnig orðið í öðrum Evvrópuríkjum, þar af eitt banaslys.

Körfurólur eru margvíslegar en þær eru lögleg leikvallatæki og uppfylla staðla leikvallareglugerða. Rólurnar njóta mikilla vinsælda og eru á fjölmörgum leikvöllum og skólalóðum, en þær eru bæði framleiddar hér á landi og erlendis. Slysið sem varð í sumar þar sem ungur drengur hryggbrotnaði varð í rólu sem framleidd var erlendis en evrópsk nefnd vinnur nú að því að endurskoða staðla yfir allar samskonar rólur.

Sjö ára drengur, Gunnleifur Orri, tognaði í baki eftir að hafa orðið fyrir körfurólu fyrir skemmstu. 

„Það voru sex krakkar í rólunni og hann er einn af tveim sem eru að ýta. Hann lendir í því að renna undir róluna þegar hann ýtir af öllu afli, fær róluna svo í bakið og í hökuna þegar hann reisir sig upp og er að reyna að koma sér á fætur. Hann lendir það illa á bakinu að hann tognar illa á baki og fær vægt höfuðhögg,“ segir Hildur Einarsdóttir móðir Gunnleifs. 

Hildur skrifaði um málið á Facebooksíðu sína eftir að hafa farið með son sinn á bráðamóttöku og skapaðist heilmikil umræða um málið. Til að mynda er greint frá því að sex ára barn hafi lærbrotnað eftir að hafa fengið samskonar rólu á sig. Hildur segir hjúkrunarfræðingur skólans haft orð á því við hana að flest þeirra slysa sem verði á skólalóðinni mætti rekja til rólunnar. Hún vill að rólan verði fjarlægð. 

„Það bara hljóta að vera til leiktæki sem hentar betur, ég trúi ekki öðru,“ segir Hildur.