Telja ekki pláss fyrir flóttamenn í Grindavík

„Eftir skoðun á minnisblaði sem unnið var af bæjarstjóra Grindavíkur er það okkar mat að húsnæðisskortur er í Grindavík og vegur það þyngst við þessa ákvörðun,“ bókuðu fulltrúar D-lista þegar meirihluti bæjarráðs Grindavíkur samþykkti að hefja viðræður um móttöku flóttamanna.

Samkvæmt tillögu meirihlutans leggur Grindavíkurbær fram tvær til þrjár íbúðir fyrir flóttamenn og ætlar í viðræður við velferðarráðuneytið um málið. Fulltrúar minnihluta Sjálfstæðisflokks sögðu þetta ekki tímabært og sátu hjá.

„Nú þegar hafa allnokkur sveitarfélög boðist til þess að fara í viðræður við velferðarráðuneytið um móttöku á flóttamönnum. Mörg af þeim stærri eru talsvert betur í stakk búin til verkefnisins varðandi þjónustu eins og túlkun, sálfræðiaðstoð, og fleira,“ bókuðu sjálfstæðismenn og bentu á að stjórnvöld hefðu ekki tekið ákvörðun um hversu marga flóttamenn á að taka inn til landsins.

„Þegar það skýrist og það verður vöntun á sveitarfélögum til að taka við flóttamönnum, erum við að sjálfsögðu tilbúin til að endurskoða okkar afstöðu.“