500 manns vilja Glaðheima á betri stað eftir að barn varð fyrir bíl

Hátt í fimm hundruð manns hafa ritað nafn sitt á lista foreldra barna í Langholtsskóla þar sem þess er krafist að frístundaheimilinu Glaðheimum verði fundin betri og barnvænni staðsetning. Listanum verður skilað til skóla- og frístundasviðs Reykjavíkurborgar á næstu dögum.

Listinn var settur á laggirnar eftir að sjö ára stúlka varð fyrir bíl á leið sinni heim í síðasta mánuði, á gatnamótum Holtavegar og Langholtsvegar. Stúlkan slapp með skrámur en móðir hennar, Anna Kristín Guðmundsdóttir, segir það hafa verið tímaspursmál hvenær slys af þessu tagi myndi gerast.

Gerði allt rétt

„Þetta var í fyrsta skipti sem hún labbaði ein heim, en hún var búin að suða um það lengi.  Hún gerði allt rétt og fór leiðina sem ég sagði henni að fara, upp Holtaveginn. Þegar hún er svo að fara yfir gatnamótin á grænu ljósi kemur bíll í hægri beygju, sér hana ekki og keyrir á hana. Ökumaðurinn var sem betur fer á mjög lítilli ferð, þannig að það fór allt betur en á horfðist,“ segir Anna.

Hún segir foreldra og kennara hafa miklar áhyggjur af stöðu mála. „Nú síðast lýsti kennari í skólanum yfir áhyggjum, til dæmis af slæmri lýsingu á morgnanna og miklum umferðarþunga. Henni finnst hún alltaf næstum því verða vitni af því að barn stórslasist þarna. Þannig að foreldrar hafa verið að tala sig saman um að skiptast á að vakta öll gatnamótin. Núna er einn gangbrautavörður sem fylgist með, en nær þó bara að fylgjast með hluta af gatnamótunum.“

Upphaflega tímabundin staðsetning

Frístundaheimilið er á horni Sæbrautar og Holtavegar, en að sögn Önnu átti sú staðsetning upphaflega að vera tímabundin. „Frístundin var til að byrja með í skólanum sjálfum, en þegar 2000 árgangurinn kom þá sprengdu þau það pláss utan af sér og átti ný staðsetning að vera til bráðabirgða. Það eru tíu ár komin tíu ár síðan, en eldri dóttir mín var einmitt í þessum árgangi.“

Lóð Glaðheima er ógirt og opin út á Sæbraut. Anna segir foreldra margoft hafa bent á hættur í kring, því bæði sé erfitt fyrir börn að leggja mat á þá hættu sem þau geti komið sér í, og að erfitt geti reynst fyrir starfsfólk að fylgjast með öllum þeim börnum sem frístundaheimilið sækja.

Þá þykja foreldrunum jafnframt afar óviðeigandi að verslun með kynlífsvörur og tilheyrandi útstillingum standi andspænis frístundaheimilinu. Því skora þeir á Reykjavíkurborg að finna heimilinu nýja og varanlega staðsetningu í Laugardalnum.