Einkarekinn skóli samþykktur en kennsluáætlun ófullnægjandi

Gögn sem Framsýn Skólafélag ehf. hefur lagt fram eru ófullnægjandi að mati þróunarfulltrúa grunnskóla Hafnarfjarðarkaupstaðar.

Fyrirtækið stefnir á að opna skóla í bæjarfélaginu fyrir allt að 45 nemendur í 9. bekk næsta haust. Fræðsluráð samþykkti á síðasta fundi sínum umsókn fyrirtækisins. Forsvarsmenn skólans munu nú hefja viðræður við menntamálaráðuneytið um öll tilskilin leyfi.

Í minnisblaði Vigfúsar Hallgrímssonar, þróunarfulltrúa grunnskóla hjá Hafnarfjarðarbæ, kemur fram að ekki sé hægt að leggja mat á gögn frá Framsýn þar sem þau séu ófullnægjandi. Einnig segir í minnisblaðinu að forsvarsmenn einkahlutafélagsins hafi ekki klárað kennsluáætlun og námsmat. Forsvarsmenn Framsýnar hafa borið fyrir sig að sú vinna verði unnin í samráði við kennara skólans, sem eigi eftir að ráða.

Þó er farið að móta hugmyndir um skólastarfið. Í starfsáætlun þessa nýja skóla fyrir næsta vetur segir í kafla um sérstöðu skólans að nemendur og kennarar heilsist með því að „kless'ann“ svo dæmi sé tekið.

Hörður Svavarsson, fulltrúi Bjartrar framtíðar í meirihluta fræðsluráðs, segir tillöguna ekki komna frá meirihluta ráðsins heldur formanninum, Rósu Guðbjartsdóttur.

Þá efast Hörður um að stefna skólans sé í samræmi við stefnu Hafnarfjarðar um skóla án aðgreiningar. Í stefnu skólans segir orðrétt. „Framsýn mun ekki henta öllum enda er það val að sækja um í skólanum.“ „Það hlýtur að vera stefna Hafnarfjarðar að þeir skólar sem þar hefja starfsemi sníði hana í samræmi við fjölskyldustefnu Hafnarfjarðar,“ segir Hörður.

„Ég orðaði það sem svo að ég styðji ekki einhvern skóla fyrir ríkra manna elítu, heldur verður að gæta jafnræðis. Það skipti máli að jafnræðis sé gætt á þessum sviðum sem öðrum. Einnig verður að tryggja að þessi aukni fjölbreytileiki verði ekki á kostnað almenna skólakerfisins,“ segir Hörður.