Braust inn í hjólhýsi í Fossvogi og dvaldi þar í leyfisleysi

Karlmaður braust inn í hjólhýsi í Fossvoginum og talið er að hann hafi búið þar um nokkurt skeið. Hjólhýsið er fyrir utan heimili eigandans, Margrétar Auðunsdóttur, og er lagt tæpum hálfum metra frá bílskúrnum. Margrét gengur því fram hjá hjólhýsinu á hverjum degi. Hún segir að orðið sem lýsi þessum manni best sé bíræfni.

„Hann hefur hugsanlega verið í hjólhýsinu um nokkurt skeið. En honum tókst að leynast alveg ótrúlega. Ég uppgötvaði þetta þegar ég opnaði hjólhýsið fyrir tæpum tveimur vikum og sá ummerkin eftir hann. Þá hringdi ég á lögregluna,“ segir Margrét.

Margrét er mjög fegin að maðurinn hafi ekki verið í hjólhýsinu þegar hún opnaði dyrnar. „Sem betur fer. Því ef fólk er króað af veit maður ekki hvað það getur tekið til bragðs. Hann reiknaði þetta vel út. Það var dregið frá stórum hluta hjólhýsisins allan tímann og ég horfði inn í það reglulega. Hann passaði að það sæjust engin ummerki og dvaldi í litlu horni inni í hýsinu. Þetta vekur óneitanlega óhug og öryggisleysi.“

Illa farið eftir veru mannsins

Hjólhýsið er afar skítugt og illa farið eftir veru mannsins. „Ég þarf að senda hjólhýsið í þrif og býst við að standa straum sjálf af þeim kostnaði. Hjólhýsið er tryggt en það er sjálfsábyrgð,“ segir Margrét og tekur fram að hjólhýsið hafi verið læst og vel vaktað af heimilismönnum. Hún hvetur því fólk til að líta vel eftir hjólhýsum sínum.

Benedikt Lund lögreglufulltrúi segir manninn vera þekktan í hverfinu. „Þetta er vesalings maður sem ráfar um og fer í öll þau skýli sem hann finnur. Hann fór til dæmis í kofa sem börn byggðu sér og hafði aðsetur þar í smá tíma.“

Benedikt segir manninn ekki vilja þiggja aðstoð borgarinnar eða dvelja í gistiskýlum.

„Það er lítið sem lögreglan getur gert, nema hann sé ákærður fyrir húsbrot. En lögreglan er ekki með nein félagsleg úrræði. Það er ekki gott að eiga við svona mál.“