Hafnarfjörður gengur gegn ráðleggingum OECD: "Viss um að þetta sé rétta leiðin“

Hafnarfjarðarbær er ósammála OECD-ríkjunum um að tölvuvæðing í kennslustofum hafi slæm áhrif á námsárangur nemenda og ætlar að fara gegn ráðleggingum þeirra. Steinunn Þorsteinsdóttir, upplýsingafulltrúi Hafnarfjarðar, segir bæinn ætla að halda áfram að spjaldtölvuvæða skólana, en fyrstu spjaldtölvurnar verða afhentar nemendum í Áslandsskóla á morgun.

Tölvurnar auðveldi nemendum námið

„Við ætlum að taka þennan sjéns. Við höldum að þetta sé rétta leiðin, erum búin að marka okkur stefnu og ætlum að fara hana,“ segir Steinunn í samtali við Vísi. Spjaldtölvurnar bjóði nemendum upp á fjölbreyttara námsefni og auðveldi þeim að nálgast það.

„Einnig erum við viss um að þetta auki frumkvæði og gefi nemendum frekari tækifæri til að vinna sjálfstætt og skapandi og uppgötvi námsefnið á eigin forsendum,“ segir hún.

OECD skiluðu af sér skýrslu í gær þar sem fram kom að tölvunotkun í kennslustofum væri ekki talin skila nemendum betri árangri, heldur þvert á móti geti haft neikvæð áhrif á námsárangur þeirra. Við gerð skýrslunnar var litið til niðurstaðna úr Pisa-könnun sem framkvæmd var í sjötíu löndum. Þar kom fram að námsárangur var hvað bestur í Austur-Asíu, þar sem tölvunotkun í kennslustofum er afar takmörkuð. Í þeim löndum sem tölvunotkun er hvað mest fór nemendum aftur í lestri.

Gerir ráð fyrir að rekast á veggi

„Við erum bara að taka fyrstu skrefin og gerum það á morgun í Áslansdskóla þegar við afhendum fyrstu ipad-ana til nemenda í fimmta bekk. Svo munu yfir þrjú hundruð nemendur á næstu vikum fá afhenta ipad-a, þannig að við höfum í raun ekki séð neina breytingu á námsárangri. En við erum búin að undirbúa þetta rosalega vel. Við erum bæði búin að undirbúa kennarahópinn, nemendahópinn og ekki síst foreldrana, því þetta er samstarfsverkefni,“ segir Steinunn.

„Við erum alveg viss um að við eigum eftir að reka okkur á veggi, eigum eftir að gera mistök í þessu og eigum eftir að prufa margt, en erum alveg viss um að þetta sé rétta leiðin.“

Eftirfylgni skortir

Guðbjörg Ragnarsdóttir, varaformaður Félags grunnskólakennara, segir vanta að fylgja eftir innleiðingu tækja og tóla með menntun þeirra sem hafa umsjón með þeim.

„Ég held að það sé hluti af vandanum. Það er í raun svolítið eins og sú hugsun hefur verið hjá okkur kennurunum. Í Kópavogi er átak þar sem verið er að innleiða spjaldtölvur, en kennararnir fengu tæki og þjálfun í notkuninni áður. Svo ráða þeir ráðgjafa sem getur komið inn í skólana og aðstoðað kennara. En hverjum skóla er gert að setja sér markmið í notkuninni og það er verið að reyna að vinna á markvissari hátt með tækin,“ segir Guðbjörg.

„Það er svo mikilvægt að mennta fólk í þessum efnum. En það er ekki nóg að hafa tækin, okkur vantar á Íslandi eitthvað sem er meiri íslenska, þannig að við höfum betri aðgang að efni á íslensku,“ bætir hún við.