Formaður borgarráðs segir mistök að Sveinbjörg Birna fékk enga afmælisköku

„Þetta voru bara mistök,“ segir S. Björn Blöndal, formaður borgarráðs, í samtali við Vísi um  afmæliskökumálið í borgarráði Reykjavíkur. Sveinbjörg Birna Sveinbjörnsdóttir, oddviti Framsóknar og flugvallarvina í borginni, greindi frá því fyrir helgi á Facebook-síðu sinni að borgarráð Reykjavíkur kaupi afmæliskökur fyrir borgarráðsmenn þegar þeir eiga afmæli á fundardegi borgarráðs, nema fyrir einn.

Borgarráð Reykjavíkur kaupir afmæliskökur fyrir borgarráðsmenn þegar þeir eiga afmæli á fundardegi borgarráðs.... Nema fyrir einn.

Posted by Sveinbjörg Birna Sveinbjörnsdóttir on Friday, September 11, 2015

Þetta sagði Sveinbjörg Birna um leið og hún deildi auglýsingu Á allra vörum, sem er átak gegn einelti, þar sem ungur drengur bíður eftir afmælisgestum sem aldrei koma. Stundin ræðir við Sveinbjörgu Birnu um málið og uppljóstrar hún að þessi eini borgarráðsmaður er hún sjálf.

Sveinbjörg segist hafa átt afmæli í janúar síðastliðnum, sama dag og borgarráðsfundur var  haldinn, en ekki var boðið upp á köku af því tilefni. Hún segir borgarráð hafa boðið upp á köku í tilefni af afmæli Dags B. Eggertssonar borgarstjóra í júní í fyrra og þegar Júlíus Vífill Ingvarsson, borgarfulltrúi Sjálfstæðisflokksins, átti afmæli í júní síðastliðnum þegar borgarráðsfundur var haldinn.

Engin hefð

S. Björn Blöndal segir enga hefð fyrir því að bjóða upp á köku þegar afmælisdag borgarráðsmanna ber upp sama dag og fundur borgarráðs er haldinn. „Það er engin hefð fyrir þessu. Síðan ég varð formaður borgarráðs þá hefur einu sinni verið keypt afmæliskaka, þegar Júlíus Vífill Ingvarsson átti afmæli. Ég rak augun í það á Facebook að hann ætti afmæli. Það var ágætis tækifæri til að vera með eina köku. En það er engin hefð fyrir þessu,“ segir Björn.

Ætlar að koma sjálf með köku

„Mér þykir bara leiðinlegt ef Sveinbjörgu hefur sárnað þetta, það var ekki meiningin, ég reyni að vera vakandi fyrir hennar afmælisdegi næst, kem jafnvel með heimabakaða köku.“

Í samtali við Stundina segist Sveinbjörg ekki líta á sig sem þolanda eineltis og ætlar sjálf að mæta með köku á fund borgarráðs næst þegar hún á afmæli