Sex vikna gömul og með krabbamein í báðum augum

Ólavía Margrét Óladóttir var greind með krabbamein í öðru auganu þegar hún var aðeins vikugömul. Í fyrradag kom í ljós að meinið finnst einnig í auganu sem talið var heilbrigt. Guðlaug Erla Björgvinsdóttir og Óli Baldur Jakobsson foreldrar Ólavíu eru nú stödd úti í Svíþjóð þar sem dóttir þeirra mun gangast undir lyfja- og lasermeðferð.

Aðstandendur vissu að allar líkur væru á að Ólavía væri veik eftir legvatnsstungu sem framkvæmd var á 35. viku meðgöngunnar. „Þannig að það voru alltaf helmingslíkur,“ segir Guðlaug í samtali við Vísi.

„Hún byrjar í lyfjameðferð fyrramálið. Hún var að fá dós í sig til þess að setja lyfin í sig,“ segir Guðlaug og það heyrist í Ólavíu hjala í bakgrunninum. Guðlaug segist ekki vita hvernig barnið bregst við lyfjagjöfinni en að hún hafi verið hress hingað til. Hana kvíðir fyrir að sjá barnið sitt missa hárið.

Meinið fannst snemma

„Ég vil helst bara raka það af, ég vil ekki sjá hárið detta af henni. Hún er með svo mikið hár í hnakkanum. Svona eins og lítið skott.“ Ólavía fer líka í lasermeðferð og þess vegna þarf hún að fara út til Svíþjóðar á þriggja vikna fresti í viku í senn. Hversu lengi Ólavía þarf að gangast undir þessa meðferð ræðst af því hvernig bati hennar gengur.

„Ég er bara glöð að hún sé svona ung. Svo hún þurfi ekki að muna eftir þessu.“

Guðlaug og Óli Baldur eru ekki par en standa þétt saman í gegnum þessa erfiðleika. Auk þess segir Guðlaug að þau eigi sterkt bakland heima fyrir, fjölskyldur þeirra sýni skilning og mikla hjálpsemi.

Það munar miklu að þekkja til veikinda af þessum toga að sögn Guðlaugar en þegar hún var ársgömul greindist hún með sama mein og dóttir hennar glímir við núna. „Læknarnir segja það sérstakt hvað þetta fannst snemma. En ég vildi láta athuga þetta því að þegar þetta uppgötvaðist hjá mér var þetta búið að éta upp augað.“

Söfnun hafin

Guðlaug missti alveg sjón á öðru auganu og hefur ekki fullkomna sjón á hinu heldur. Þó segir hún læknateymi dóttur hennar bjartsýnt á að það takist að lækna Ólavíu.

Álagið er mikið á foreldrunum sem eru ung að árum, Guðlaug er aðeins 19 ára gömul og Óli Baldur er nýorðinn 23 ára. Til að létta af þeim fjárhagsáhyggjum hófu móðir hennar og frænka söfnun fyrir þau.

Reikningsnúmerið er 0142-05-073060 og kennitala Guðlaugar er 090396-3239 en reikningurinn er á hennar nafni.

Ólavía Margrét elsku sterka og fallega litla frænka mín, dóttir bróðir míns fæddist 30. júlí 2015 inn í faðm elskulegra...

Posted by Sigurlaug Jóna Jakobsdóttir on Wednesday, September 2, 2015