Bein útsending: Hitafundur í Hafnarfirði

Búast má við miklum hita á aukafundi í bæjarstjórn Hafnarfjarðar sem hefst klukkan 09:15 í fundarsal bæjarstjórnarinnar í Hafnarborg.

Eitt mál er á dagskrá fundarins en það varðar tillögu að breytingum á stjórnskipulagi sveitarfélagsins. Formlegt fundarboð var sent út síðastliðið föstudagskvöld en bæjarstjórnin fór í tveggja vikna sumarfrí síðastliðinn miðvikudag.

Minnihlutinn í bæjarstjórn Hafnarfjarðar hefur gagnrýnt þetta fundarboð harðlega og sagði Gunnar Axel Axelsson, oddviti Samfylkingarinnar í Hafnarfirði, engar stjórnkerfisbreytingar hafa verið ræddar í bæjarráði sem þó fari með formlegt umboð til meðferðar mála sem snerta stjórnkerfi og fjármál sveitarfélagsins.

Uppfært klukkan 12:25

Fundurinn var í beinni útsendingu á vef Hafnarfjarðarbæjar og hér á Vísi. Fundinum er lokið en hann má innan tíðar nálgast á heimasíðu Hafnarfjarðarbæjar.