Tugir létust í brúðkaupi í Jemen

Að minnsta kosti þrjátíu létu lífið í brúðkaupi í bænum Sanabani í Jemen eftir að loftárásir voru gerðar á bæinn. Þá eru þó nokkrir særðir.

Sanabani er í suðvesturhluta Jemen en svæðinu er stjórnað af Hútí-uppreisnarmönnum. Blóðug átök hafa geisað í Jemen síðustu misseri á milli uppreisnarmannanna og stjórnarhersins í Jemen. Sádi-Arabar fara fyrir loftárásum gegn Hútíum í Jemen en uppreisnarmennirnir stjórna stórum svæðum í landinu.

Ekki er ljóst hver ber ábyrgð á árusunum í dag, samkvæmt frétt CNN, en alls hafa um 4000 óbreyttir borgarar látið lífið í átökum uppreisnarmanna og stjórnvalda í Jemen á árinu.