Skúrar splundruðust á Stöðvarfirði

„Tjónið er umtalsvert mikið, ég hef ekki fengið fregnir af tjóni annars staðar í Fjarðabyggð en það virðist vera mest hér á Eskifirði,“ segir Jens Garðar Helgason, formaður bæjarráðs Fjarðabyggðar.

„Annað sjóhúsið virðist vera ónýtt og báðar bryggjurnar farnar, þær liggja við sjóhúsin og svo er spýtnabrak út allan fjörðinn og upp á bryggju. Aðalgatan er mikið skemmd á kafla þar sem malbikið flettist af henni.“

Fólk hafði áhyggjur af ánum í fjallinu fyrir ofan bæinn vegna vatnavaxta en þær voru að mestu til friðs. Smábátahöfnin er nokkuð skemmd en bátar sluppu.

„Björgunarsveitirnar unnu alveg þrekvirki hérna,“ segir Jens.

Nokkrar skemmdir voru við Mjóeyri yst í bænum en mikið landrof varð á eyrinni vegna flóða eða um tvo til þrjá metra inn á eyrina.

„Eyrin er stórskemmd og ljót yfir að líta,“ segir Sævar Guðjónsson, eigandi ferðaþjónustunnar á Mjóeyri.

Verið er að hlaða upp á eyrina ef ske kynni að veðrið tæki að versna aftur en til stendur að reisa á eyrinni varnargarð.

„Randúlfshúsið sem við höfum haft undir Sjóminjasafnið er svolítið skemmt, þetta er gríðarlega verðmætt 120 ára gamalt hús. Það slapp þó ágætlega en bryggjan fyrir framan það er orðin mjög ljót.“

Leiði Eiríks Þorlákssonar, sem var hálshöggvinn árið 1786 á Mjóeyri, fór á flot og riðlaðist til. Aftakan var sú síðasta sem framkvæmd var á Austurlandi. „Leiðið er komið svona inn á miðjan reitinn.“

Undir miðvikudagsmorgun gerði aftakaveður á Stöðvarfirði að sögn Margeirs Margeirssonar, formanns björgunarsveitarinnar Björgólfs á Stöðvarfirði.

„Tjónið er gríðarlegt í bænum,“ segir Margeir. „Það var geymsluhúsnæði og verkstæði sem trillumaður var með, það bara splundraðist. Svona einn þriðji sem stendur eftir af því.“ 

Um er að ræða verbúðina Söxuver en húsið fauk á rafveituhús sem stórskemmdist. 

„Svo var olíuskúr úti í þorpi sem splundraðist, gróðurhús og fleira. Svo gekk sjórinn svo mikið yfir að það sprakk einn rafmagnskassi.“

Litlar skemmdir urðu á Norðfirði en rafmagnslínum sló saman og rafmagn fór af um stund. Þá varð lítið tjón á Egilsstöðum.