Konur fá skjól um jól í kotinu

„Hér verða 6 til 10 konur um jólin,“ seg­ir Svala Jóhannesdóttir, verk­efna­stýra Konu­kots.

Konu­kot er at­hvarf Rauða kross­ins í Reykjavík fyr­ir heim­il­is­laus­ar kon­ur og verða tólftu jól­in hald­in þar í ár.

„Á aðfangadag og jóladag er opið allan sólarhringinn, gestirnir geta þá verið inni allan daginn. Á aðfangadagskvöld erum við með hátíðarkvöldverð, forrétt, aðalrétt og eftirrétt. Gestirnir okkar fá veglegar gjafir, þær eru frá einstaklingum og hópum sem hafa styrkt okkur. Á jóladag reynum við að hafa það huggulegt og bjóðum upp á smákökur, nammi og fleira. Þá er líka opið hér allan sólarhringinn á gamlárskvöld og nýársdag. Þá borðum við góðan mat, horfum saman á skaupið og flugeldana.“

Fjölmargir sjálfboðaliðar leggja Konukoti lið með ýmsum hætti. Þannig hafa konurnar í Konukoti fengið árlega jólaklippingu og er veislumáltíðin um jólin elduð af matreiðslumanni.

„Hér koma sjálfboðaliðar allt árið í kring, jólaklippingin er búin í ár. Mikið hefur verið leitað til okkar og eru margir sem hafa gefið gjafir fyrir jólin og erum við erum afar þakklát fyrir það.“

En skyldi þær vanhaga um eitthvað? „Sumar af gestunum eru með bága heilsu og eiga því erfiðara með að vera fótgangandi. Við reynum því að aðstoða þær með strætómiðum, svo þær komist á öruggan hátt á milli staða, þetta er það helst sem okkur vantar núna. Annars mæli ég með því að þeir sem vilja styðja við Konukot hafi samband við mig,“ segir Svala.

Mikill fjöldi kvenna hefur leitað í Konukot í ár. Svala segir flestar þeirra staldra ekki lengi við í einu.

„Við aðstoðum þær við að komast á annan stað í lífinu og oft tekst það. Við aðstoðum þær við að sækja um félagslegt húsnæði, sækja sér heilbrigðisþjónustu, komast í meðferð og ýmislegt fleira. Á þessu ári hafa 80 heimilislausar konur leitað til okkar. Þær koma til að hvíla sig og leita í öruggt rými. Hér geta þær þvegið fötin sín, farið í sturtu og fengið að borða en við erum með heitan kvöldmat og morgunmat.“

Konukot er með þjónustusamning við velferðarsvið Reykjavíkurborgar út árið 2016. Svala segir að samningurinn nái ekki utan um rekstur athvarfsins, og því reiða þau sig á styrki frá fyrirtækjum og almenningi.

Hún segir færri úrræði til handa heimilislausum konum. „Það er ekkert búsetuúrræði fyrir konur með fíknivanda og geðrænan vanda og heldur ekkert búsetuúrræði fyrir konur í virkri vímuefnanotkun með sólarhringsaðstoð, en bæði þessi úrræði eru til fyrir karlmenn. Það eru konur hjá okkur í Konukoti vegna úrræðaleysis í kerfinu.“