Einungis 143 fyrirtæki með fleiri en eitt hundrað starfsmenn

Atvinnumál Einungis 143 fyrirtæki voru með fleiri en 100 starfsmenn á árinu 2014, en hjá þeim störfuðu tæplega 42 þúsund manns og rekstrartekjur námu 1.527 milljörðum króna, samkvæmt tölum Hagstofunnar. Árið 2014 var 26.801 virkt fyrirtæki með tæplega 111 þúsund starfsmenn. Rekstrartekjur þessara fyrirtækja námu rúmlega 3.300 milljörðum króna. Af virkum fyrirtækjum eru 23.718 með færri en fimm starfsmenn og alls 25.180 með færri en 10 starfsmenn. Hjá fyrirtækjum með færri en 10 starfsmenn starfa samtals 32.150 og rekstrartekjur þessara fyrirtækja námu tæpum 708 milljörðum króna árið 2014. Flest fyrirtæki voru í byggingarstarfsemi og mannvirkjagerð árið 2014, eða 4.556, næstflest voru með sérfræðilega, vísindalega og tæknilega starfsemi en þar voru 4.342 fyrirtæki, þar á eftir voru flest í heild- og smásöluverslun og viðgerðum á ökutækjum 3.875. Flestir starfsmenn vinna í flokknum heild- og smásöluverslun, viðgerðir á ökutækjum, eða 23.790, næstflestir vinna í flokknum framleiðsla, án fiskvinnslu; vinnsla hráefna úr jörðu, eða 16.379, þar á eftir vinna flestir í rekstri gististaða og veitingarekstri eða 11.472. – sg