Hellisheiði, Þrengslum og Mosfellsheiði líklega lokað á morgun

Vitlaust veður er í kortunum fyrir morgundaginn og hafa almannavarnir og lögregluembætti víða á landinu varað fólk við að vera á ferli. Spáð er austan ofsaveðri á morgun og fram á þriðjudag á öllu landinu með snjókomu og byl.

Veðrið skellur fyrst á Suðurlandi og segir í tilkynningu frá almannavörnum að ekki sé ráðlegt að vera á ferðinni eftir klukkan 12 á hádegi. Á öðrum stöðum, þar með talið á höfuðborgarsvæðinu, er fólk varað við því að vera á ferðinni eftir klukkan fimm síðdegis.

Vindaspákort Veðurstofu Íslands hefur sjaldan verið litríkara en dökki guli liturinn sem sést víða á þessari mynd táknar vind í kringum 40 metra á sekúndu. 

Gera má ráð fyrir mikilli ófærð á landinu öllu en samkvæmt upplýsingum frá lögreglunni á Suðurlandi hefur þegar verið ákveðið að loka hringveginum frá Markarfljóti að Breiðamerkurlóni fyrir allri umferð eftir hádegi á morgun. Hellisheiði, Þrengslum og Mosfellsheiði verður einnig að öllum líkindum lokað klukkan fjögur síðdegis ef veðurspáin gengur eftir.

Ekkert ferðaveður verður því á landinu.

Samkvæmt tilkynningu almannavarna er talið að snjóflóðahætta muni aukast hratt samfara veðrinu en mikil úrkoma fylgir veðrinu í formi snjókomu sérstaklega á Norðurlandi og Austurlandi