Rikki Gje ber enn meiri virðingu fyrir Almari eftir innlit í kassann

Kolbeinn Tumi Daðason skrifar 7. desember 2015 10:17

Almar bendir Rikka Gje á glerkassann þar sem væri að finna malt og appelsín. Vísir/GVA

Líkt og alþjóð ætti að vera meðvituð um yfirgaf Almar Atlason glerkassann í Listaháskóla Íslands í morgun klukkan níu eftir vikudvöl. Bein útsending var frá síðasta hálftímanum á Vísi þar sem Gummi Ben lýsti lokasprettinum.

Útvarpsmaðurinn og knattspyrnulýsandinn góðkunni Rikki Gje var svo mættur á staðinn og til stóð að hann tæki fyrsta viðtalið við Almar. Almar, sem var að standa á fótum sínum í fyrsta skipti í viku, var hins vegar ekki í stuði til að gefa viðtöl eðlilega nokkuð dasaður eftir vikuna. Hann benti Rikka á kassann og sagði honum að þar gæti hann fengið sér malt og appelsín.

Sjáðu einnig:Lýsing Gumma Ben í heild sinni

Einhverjir hafa gagnrýnt Rikka á samfélagsmiðlum fyrir að taka Almar á orðinu að því leyti að hann fór inn í kassann í nokkrar sekúndur. Rikki biðst afsökunar hafi hann móðgað fólk með því.

„ Áður en ég fór inn hafði Almar sagt við mig að ég mætti kíkja inn og fá mér malt og appelsín, síðan voru aðrir búnir að opna kassann og reka hausinn inn. Ég tók spontant ákvörðun að kíkja inn í nokkrar sekúndur, ég snerti ekki neitt þarna inni, eingöngu langaði mig að fá smjörþefinn af tilfinningu hans hvernig það sé að vera lokaður inn í kassa,“ segir Rikki.

Sjá einnig:Kona Almars rosalega stolt af honum

Rikki lýsti því í beinni útsendingu hvernig lyktin var inni í kassanum og var greinilegt að hún var ekki góð. Það var greinilega skrýtin upplifun fyrir útvarpsmanninn að kíkja inn í kassann, frægasta kassa landsins.

„Eftir þessa tilfinningu ber ég enn meiri virðingu fyrir honum að þrauka þetta út. Ég biðst afsökunar ef þetta móðgaði fólk. Málið var alls ekki að gera lítið úr verkinu. Heldur bara að lýsa fyrir fólki hvað hefði verið í gangi þarna inni.“

Útsendinguna í morgun má sjá í heild sinni hér að neðan.