Kröfuhafar fá yfir 30 prósent upp í kröfur

Kröfuhafar Glitnis fá 31,5 prósent greitt upp í kröfur umfram 3,5 milljónir króna samkvæmt áætlun slita­stjórnar bankans. Endanleg upphæð veltur þó á ávöxtun eigna.

Kröfuhafafundur Glitnis fer fram 20. nóvember. Þar verður kosið um uppfært stöðugleikaframlag sem felur meðal annars í sér að slitabúið afhendi ríkinu 95 prósenta hlut sinn í Íslandsbanka. Samhliða verða greidd atkvæði um frumvarp að nauðasamningi.

Samkvæmt því fá kröfuhafar sem eiga lægri en 3,5 milljóna króna kröfu, um 1.200 talsins, greitt að fullu. Þá fá kröfuhafar sem eiga hærri kröfu, um 1.500 talsins, einnig greiddar 3,5 milljónir króna. Því verða kröfuhöfum greiddar jafnvirði 516 milljarða króna í reiðufé í hlutfalli við kröfu sína. Upphæðin verður greidd í evrum, dollurum, breskum pundum og norskum krónum. Upphæðin samsvarar 22,9 prósentum af lýstum kröfum.

Við samþykki nauðasamninga gefur Glitnir út skuldabréf, sem og hlutabréf, í nýju eignaumsýslufélagi til kröfuhafa Glitnis. Á næsta ári er svo stefnt að því að greiða 110 milljarða af skuldabréfinu og svo áfram næstu árin. Upphæðirnar ráðast af því hversu vel gengur að ávaxta eignir Glitnis sem eftir standa að loknum nauðasamningum. Engu að síður er búist við að 31,5 prósent fáist upp í þær kröfur sem eftir standa þegar búið er að greiða öllum kröfuhöfum 3,5 milljónir.

Slitastjórnin tilnefnir Norðmanninn Tom Grøndahl, Danann Steen Parsholt og Bretann Mike Wheeler í stjórn nýja eignaumsýslufélagsins. Þeir voru allir meðal þeirra sem Glitnir tilkynnti árið 2012 að tækju sæti í fimm manna stjórn eignaumsýslufélagsins. Hvorki Svíinn Jan Kvarnström, sem þá átti þá að verða formaður, eða Steinunn Guðbjartsdóttir, formaður slitastjórnarinnar, eru tilnefnd í stjórnina.

Soros ekki í hópnumBreytingar hafa orðið á eignarhaldi stærstu kröfuhafa Glitnis að undanförnu. Vogunarsjóður í eigu breska fjárfestisins George Soros er ekki lengur meðal kröfuhafa. DV hafði greint frá því að sjóðurinn Quantum Partners LP hefði keypt kröfur að verðmæti 44 milljarða króna í janúar á þessu ári af vogunarsjóðnum Burlington Loan Management og væri orðinn 10. stærsti kröfuhafi Glitnis. Þá er vogunarsjóðurinn Recovery Oppor­t­­unities orðinn stærsti kröfuhafi Glitnis og á kröfur að nafnvirði 280 milljarða króna, 11,16 prósent allra krafna. Sjóðurinn var stofnaður á síðasta ári og átti í mars kröfur að verðmæti 114 milljarða króna samkvæmt frétt DV þann 10. mars.