Bíó og sjónvarp

Ágústa Eva og Þorvaldur Davíð leika í „draugaþriller“ á Hesteyri

Birgir Olgeirsson skrifar
Ágústa Eva Erlendsdóttir og Þorvaldur Davíð Kristjánsson munu fara með stór hlutverk í myndinni sem gerist meðal annarrs á Hesteyri.
Ágústa Eva Erlendsdóttir og Þorvaldur Davíð Kristjánsson munu fara með stór hlutverk í myndinni sem gerist meðal annarrs á Hesteyri. Vísir/Stefán/Valli/Pjetur
Tökur eru á hefjast á kvikmyndinni Ég man þig sem byggð er á samnefndri skáldsögu Yrsu Sigurðardóttur frá árinu 2010. Það eru ZikZak kvikmyndir og Sigurjón Sighvatsson sem framleiða myndina en leikstjóri hennar er Óskar Þór Axelsson sem á að baki kvikmyndina Svartur á leik.

Hesteyri er í Hesteyrarfirði í Jökulfjörðum á Vestfjörðum. Það tekur um það bil fjörutíu mínútur að sigla þangað frá Bolungarvíkurkaupstað.Kort/Landakort.is
Í þeirri mynd fór leikarinn Þorvaldur Davíð Kristjánsson með aðalhlutverkið en hann mun einmitt fara með eitt af aðalhlutverkunum í Ég man þig ásamt Ágústu Evu Erlendsdóttur. Ég man þig segir frá ungu fólki, sem Þorvaldur Davíð og Ágústa Eva leika, sem fer til Hesteyrar í Jökulfjörðum um miðjan vetur til að gera upp hús en fer að gruna að þau séu ekki einu gestirnir í þessu eyðiþorpi. Á sama tíma dregst ungur læknir á Ísafirði inn í rannsókn á sjálfsmorði eldri konu.

Tökuteymið er væntanlegt til Vestfjarða í næsta mánuði þar sem haldið verður til Hesteyrar til að festa þessa sögu á filmu. Er það fyrsti áfangi í tökum kvikmyndarinnar en einnig er á dagskránni að taka upp á Ísafirði og svo suður í Reykjavík samkvæmt heimildum Vísis en það mun þó ekki gerast fyrr en á næsta ári.

Læknishúsið á Hesteyri þar sem tökuteymi myndarinnar mun meðal annars dvelja á meðan tökum stendur. Vísir/Stefán
Þeir sem hafa komið til Hesteyrar vita að það er enginn hægðarleikur að hafast þar við svo síðla árs. Þorpið fór í eyði rétt eftir miðja síðustu öld en þar standa níu hús sem notuð eru sem sumarhús. Ekki er gert ráð fyrir dvöl í þeim til lengri tíma yfir vetrarmánuðina og þarf til að mynda að fara þangað með nokkurra daga fyrirvara áður en tökuteymið mætir á staðinn til að kynda upp húsin sem á að dvelja í. Líklegast verða Læknishúsið, þar sem rekin er ferðaþjónusta á sumrin, og Skólinn fyrir valinu.

Sagan hennar Yrsu hefur notið töluverðra vinsælda en kvikmyndahandritið vann leikstjórinn sjálfur Óskar Þór ásamt Ottó Borg. Verkefnið hefur fengið 90 milljóna króna styrk frá Kvikmyndamiðstöð Íslands en Óskar sagði í samtali við Fréttablaðið í mars síðastliðnum að myndin yrði draugaþriller“.


Tengdar fréttir

Leikstjóri Svartur á leik snýr sér að Ég man þig

Óskar Axelsson, leikstjóri Svartur á leik, hefur verið ráðinn til að leikstýra hrollvekju sem byggð verður á metsölubók Yrsu Sigurðardóttur "Ég man þig". Sjálfur var hann skíthræddur við lestur bókarinnar og missti svefn.




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.