Miklu fleiri lesa sér nú til gagns í Fellaskóla

Sextíu og sjö prósent nemenda í 2. bekk í Fellaskóla í Breiðholti gátu lesið sér til gagns í lesskimuninni Læsi sem lögð var fyrir grunnskólanemendur í Reykjavík síðastliðið vor. Hlutfallið er nú í fyrsta sinn yfir meðaltali í borginni. Á tímabilinu 2003 til 2013 var hlutfallið 22-49 prósent, að því er kemur fram í aðsendri grein Ragnars Þorsteinssonar, sviðsstjóra skóla- og frístundasviðs Reykjavíkur, í Fréttablaðinu í dag.

Starfsfólk skólans, þar sem sjö af hverjum tíu nemendum eiga annað móðurmál en íslensku, er auðvitað ánægt með árangurinn og þakkar hann samspili margra þátta, til dæmis nýrra kennsluaðferða, samfellds skóladags og fjölda stuðningsfulltrúa sem eru einn í hverjum bekk í 1. og 2. bekk.

Nýjum kennsluaðferðum var bætt við fyrir nokkrum árum, meðal annars Byrjendalæsi og lestrarkennsluaðferðinni PALS sem byggir á samvinnunámi. PALS, Peer assistant learning strategies, hefur hlotið nafnið Pör að læra saman á íslensku. Stuðst er við niðurstöður úr lesfimiprófum til að para nemendur, tvo og tvo saman, til að tryggja að ekki verði of mikið misvægi á getu þeirra sem vinna saman. „Nemendur lesa hvor fyrir annan, leiðrétta hvor annan, ræða efnið sín á milli og velta fyrir sér hvað kemur næst í textanum. Þeir gefa líka hvor öðrum stig,“ segir Kristín Sverrisdóttir grunnskólakennari, einn þeirra kennara sem kenndu 2. bekk í fyrra.

Haustið 2012 varð sú breyting á starfi 1. og 2. bekkjar að samfelldur skóladagur var lengdur. Hann er nú til 15.40 í stað 13.30. Að sögn Kristínar var skóladagurinn samþættur frístundastarfi og greiða foreldrar ekkert gjald til klukkan 15.40 á daginn. „Þetta er þróunarverkefni og sérstök áhersla er lögð á málörvun, félagsfærni, jákvætt námsumhverfi og jákvæð samskipti. Sömu stuðningsfulltrúarnir eru með börnunum allan daginn. Það skiptir einnig máli,“ tekur Kristín fram.

Hún segir að ekki megi gleyma þætti sumarlesturs sem lögð hefur verið áhersla á. „Við höfum hvatt til sumarlesturs nemenda á yngsta stiginu og hann hefur aukist. Börnin fá medalíur á haustin fyrir sumarlesturinn og það finnst þeim spennandi.“