Enginn slasaðist þegar bíl var ekið inn í verslun við Ármúla

Engin slys urðu á fólki þegar bíl var ekið inn í verslunina Merkismenn á horni Ármúla og Selmúla í Reykjavík í hádeginu.

Gunnar Trausti Guðbjörnsson, framkvæmdastjóri og eigandi Merkismanna, segir í samtali við Vísi að ökumaður bílsins hafi stigið á bensíngjöfina í staðinn fyrir bremsuna fyrir framan versluninna. „Þannig fór billinn upp tröppurnar, inn hurðina og heila galleríið.“

Gunnar Trausti segir að lögregla og sjúkralið hafi komið á vettvang, en nokkra stund hafi tekið að ná ökumanninum úr bílnum. „Hurðin var klemmd en það var þó allt í lagi með ökumanninn.“

Gunnar segir að starfsfólk verslunarinnar hafi ýmist verið í mat eða inni í sal þegar slysið varð. Engir kúnnar hafi heldur verið við afgreiðsluborðið í versluninni.

„Tjónið var ekki mikið nema þá glugginn sjálfur. Við erum að bíða eftir tryggingarfélaginu og smið til að loka þessu áður en fer að hvessa og rigna.“