Októberspá Siggu Kling – Bogmaður: Húmorinn bjargar þér alltaf

Elsku besti Bogmaðurinn minn. Þú getur bara látið lífið svolítið ráðast í þessum mánuði, pínulítið kæruleysi gerir lífið þitt betra í þeim kringumstæðum sem þú ert í.

Ef þér líður eitthvað illa þá er það hugurinn að senda vitlaus skilaboð, ýttu bara á Delete-takkann og breyttu hugsunum þínum.

Þú ert ekki bara frábær starfsmaður heldur ættir þú að skoða það að byggja upp þitt eigið fyrirtæki. Þú ert náttúrulega fyrirtæki ef þú pælir í því!

Farðu að gera allt sem þú getur til að efla þetta fyrirtæki sem þú ert. Gerðu alltaf plan þegar þú vaknar, það þarf ekki að vera stórt í sniðum og skrifaðu niður nokkur stikkorð að góðum degi.

Það besta við þig er að þú þolir ekki fordóma af neinu tagi. Þú verður beðinn um að hjálpa til í veröldinni því þú ert þessi týpa sem segir yfirleitt já við öllu og það hefur leitt þig á góðan stað oftar en einu sinni og mun gera það aftur.

Auðvitað ertu búinn að gera mörg mistök en ef þú gerir sömu mistökin aftur og aftur þá eru það ekki mistök heldur bara einlægur brotavilji. Hafðu húmor fyrir lífinu því það er hann sem bjargar þér alltaf.

Mottó: Þetta er mitt partí og ég ræð hverjum ég býð.

Frægir Bogmenn: Ingvar E. Sigurðsson leikari, Björgvin Franz Gíslason leikari, Edda Heiðrún Backman leikkona, Regína Ósk Óskarsdóttir söngkona, Sigrún í Gyðja Collecton, Steindi, Bryndís Ásmundsdóttir, leik- og söngkona, Jóhanna Vilhjálmsdóttir, fjallkona og leikkona, Logi Bergmann Eiðsson sjónvarpsmaður, Sigga Dögg kynfræðingur og Hemmi hársnillingur á Módus.