Vilja minnast 200 ára afmælis Jóns Árnasonar

Fjórir þingmenn hafa lagt fram þingsályktunartillögu um að fela mennta- og menningarmálaráðherra að láta minnast Jóns Árnasonar, landsbókavarðar og þjóðsagnasafnara, með „tilhlýðilegum hætti“ þegar tvær aldir eru liðnar frá fæðingu hans árið 2019.

Vilhjálmur Bjarnason, þingmaður Sjálfstæðisflokks, er fyrsti flutningsmaður tillögunnar.

Samkvæmt tillögunni skal Jóns meðal annars vera minnst með því að Landsbókasafn Íslands og Háskóli Íslands standi fyrir veglegri ráðstefnu um lífsstarf hans. Þá verði sett upp lágmynd af Jóni í húsakynnum Landsbókasafnsins og einnig norður á Skaga, sem næst fæðingarstað hans. „Slíkt látlaust minnismerki hæfði vel minningu Jóns.“

Kostnaður við gerð og uppsetningu lágmynda og ráðstefnu og gestakomur er samtals áætlaður fjórar milljónir.

Jón Árnason fæddist á Hofi á Skagaströnd 17. ágúst 1819. Hann lést 4. september 1888 og er hann jarðaður í gamla kirkjugarðinum við Suðurgötu.

Í greinargerð með tillögunni segir að Jón og Magnús Grímsson hafi hafið söfnun íslenskra þjóðsagna um miðja 19. öld. „Þjóðernisvakning 19. aldar hafði meðal annars í för með sér áhuga á þeim frásögnum sem gengu mann fram af manni og enginn vissi höfund að og var farið að kalla þjóðsögur.“

Árangur af söfnun Jóns og Magnúsar leit dagsins ljós 1852 í bókinni Íslenzk æfintýri, en fyrir forgöngu Jóns Sigurðssonar forseta og velvild Konrads Maurer kom út í Leipzig árin 1862 og 1864 tveggja binda útgáfa þjóðsagnasafns sem kennt er við Jón Árnason, Íslenzkar þjóðsögur og æfintýri.