Tvöfalda þarf fjölda rannsóknarlögreglumanna á höfuðborgarsvæðinu

Aldís Hilmarsdóttir, aðstoðaryfirlögregluþjónn hjá lögreglunni á höfuðborgarsvæðinu og yfirmaður fíkniefnadeildar lögreglunnar, segir að tvöfalda þurfi þann fjölda lögreglumanna á höfuðborgarsvæðinu sem vinna við rannsóknir. Nú séu þeir um fjörutíu talsins en þurfi að vera um áttatíu svo sinna megi öllum þeim málum sem koma upp.

Fram kemur í nýrri skýrslu greiningardeildar ríkislögreglustjóra að öll lögregluumdæmi landsins telji takmarkaða möguleika á frumkvæðisvinnu vegna niðurskurðar á fjárveitingum. Það hefti til dæmis upplýsingaöflun um starfsemi skipulagðra brotahópa.

„Við fáum mjög margar ábendingar inn og almenni lögreglumaðurinn bæði fær ábendingar og verður ýmiss var á vettvangsferðum sínum. Þannig að við erum með mikið af upplýsingum og rökstuddan grun um starfsemi sem við getum því miður ekki brugðist við því við höfum ekki nógu mikið af fólki og tækjum,“ segir Aldís sem var í spjalli í Bítinu á Bylgjunni í morgun.

Lögreglumönnum fækkað um 100 á átta árum

Að hennar sögn hefur lögreglumönnum á höfuðborgarsvæðinu ekki verið fjölgað seinustu ár, þrátt fyrir til dæmis mikla fjölgun ferðamanna. Þvert á móti hefur lögreglumönnum fækkað um 100 frá árinu 2007 og fjárframlög minnkað á sama tíma um samtals milljarð króna.

„Ég stýri rannsóknum og ef að við ættum að gera allt sem að við viljum gera, sinna öllum ábendingum og annað slíkt, þá þyrftum við að vera að minnsta kosti tvöfalt fleiri. Öll miðlæga rannsóknardeildin hjá lögreglunni á höfuðborgarsvæðinu telur um fjörutíu manns. Þá erum við að tala um öll brot, kynferðisbrot, fjármunabrot, fíkniefnabrot, skipulagða brotastarfsemi.“

Aldís segir að álagið sé mjög mikið á alla lögreglumenn og vinnuslys og veikindi séu mjög tíð. Þá sé fólk að vinna mjög mikið fyrir lág laun en eins og greint hefur verið frá í fjölmiðlum undanfarna daga eru lögreglumenn afar ósáttir við kjör sín og hafa meðal annars boðað til baráttufundar í Háskólabíói klukkan 17 í dag ásamt fleiri stéttarfélögum. 

Viljum við aðeins viðbragðslögreglu?

Að mati Aldísar snýst málið um það hvernig samfélagi við viljum búa í.

„Viljum við hafa lögreglu sem er bara í viðbragði? Sem er bara að bregðast við því sem kemur upp? Þegar búið er að flytja inn fíkniefnin, þegar búið er að ganga í skrokk á þessum manni eða viljum við geta unnið að þessu fyrr? Þá er ég ekki að tala um forvirkar rannsóknarheimildir heldur þegar uppi er rökstuddur grunur um brot.“