Mikið um lús í leik- og grunnskólum

Töluvert hefur verið um lús í leik- og grunnskólum að undanförnu. Fjöldi smita liggur þó ekki fyrir að svo stöddu, en unnið er að því að taka saman fjöldann. Ása Atladóttir sóttvarna-hjúkrunarfræðingur segir að eina ráðið til að losna við lúsina sé að kemba hárið vandlega. Helst þyrftu foreldrar að kemba börnum sínum vikulega.

„Það er búið að vera mikið um lús undanfarin tvö ár, en við vitum ekki hvað það er sem veldur því. En eina ráðið er að kemba barninu vel, og best væri ef foreldrar hefðu það sem reglu að kemba barninu sínu, helst einu sinni í viku og koma þessu inn í rútínuna. Það er langöruggast því þrátt fyrir að lúsin sé farin úr hárinu þá er oft mikið af niti eftir,“ segir Ása.

Mikilvægt að leita sér ráðlegginga

Hún segir að mikið sé um lúsalyf á markaði sem ekki virki sem skyldi. Því sé mikilvægt að fólk skoði innihaldslýsingar vel. „Það sem hefur breyst á undanförnum árum er að það er mikið af nýjum lyfjum í lyfjabúðum. Áður voru þau byggð á skordýraeitri en núna er meira um náttúruefni, sem því miður eru ekki alltaf mjög góð. Þannig að neytendur þurfa að vera svolítið vakandi,“ segir Ása og hvetur fólk til að leita sér ráðlegginga. Lúsalyfin dugi þó ekki ein og sér.

Lúsin fer alla jafna á stjá á þessum tíma árs, eða þegar skólarnir hefjast. Foreldrar hafa margir hverjir fengið póst þar sem þeir eru minntir á mikilvægi þess að kemba börnunum, en leiðbeiningar þess efnis má nálgast á vef Landlæknis. Allir geta smitast en lúsin er algengust hjá þriggja til tólf ára börnum.