Tíu prósent eitrana vegna neyslu á ofskynjunarsveppum

Rúm tíu prósent þeirra sem koma á Landspítalann vegna eitrana frá ólöglegum vímuefnum, koma vegna neyslu á ofskynjunarsveppum.Tvö til fimm eitrunartilvik vegna sveppanna komi upp á ári. Læknir og eiturefnafræðingur segir dæmi um dauðsföll af völdum samskonar sveppa í nágrannalöndunum. 

Stöð 2 greindi í gær frá því hinn sautján ára gamli Bjarki Freyr hefði fleygt sér niður af sex metra háum svölum eftir að hafa neytt ofskynjunarsveppa.

Þórarinn Tyrfingsson, yfirlæknir á Vogi, segir að reglulega komi fólk inn þangað inn í annarlegu ástandi vegna neyslu ofskynjunarsveppa. Sérstaklega sé þá algengt að kannabisneytendur sæki í skynáhrifin sem sveppirnir veita.

Að sögn fíkniefnadeildar lögreglunnar á höfuðborgarsvæðinu koma árlega upp mál þar sem ofskynjunarsveppir koma við sögu. Þó er um að ræða minniháttar vörslumál og ekkert sem bendir til þess að skipulögð dreifing eða sala sé á þessari tegund fíkniefna þó bannað sé að neyta þeirra og selja.

Á hverju ári koma upp tilfelli um eitranir vegna ofskynjunarsveppa inn á borð eitrunarmiðstöðvar Landspítalans en í flestum tilfellum er þar um að ræða ungt fólk. 

Svanur Sigurbjörnsson, læknir og eiturefnafræðingur, segir einkennin margvísleg.

„Manneskjan er mjög rugluð og það er ekki hægt að fá hana til samstarfs um neitt. Hún virðist sjá skordýr og flugur og er oft gjörsamlega bara frávita. Rétt eins og móðirin lýsti í viðtalinu í gær þá er þetta náttúrlega hræðilegt fyrir ættingja að horfa upp á og afskaplega vandmeðfarið á bráðamóttöku,“ segir hann.

Dæmi eru um dauðsföll af völdum sveppa á hinum Norðurlöndunum. 

„Það eru mörg dæmi um dauðsföll í nágrannalöndum okkar, og það er sérstaklega vegna þess að þar eru sveppir sem eru mjög eitraðir fyrir lifur. Hér heima höfum við ekki haft nein slíkt tilvik sem betur fer en það gæti verið þó ég viti ekki um það, “ segir Svanur.