Spjaldtölvuvæðing í Áslandsskóla

Fyrsta skref í spjaldtölvuvæðingu Áslandsskóla í Hafnarfirði var tekið í dag þegar nemendur í fimmta bekk skólans fengu sín tæki afhent. Unnið hefur verið að undirbúningi spjaldtölvuvæðingar í skólanum frá því um áramót.

„Með þessu er verið að stíga mikilvæg skref í að auka fjölbreytni og efna framþróun í hafnfirsku skólastarfi. Hraðar tæknibreytingar bjóða upp á óeendanlega möguleika í kennsluháttum og námi og er spjaldtölvuvæðing liður í að nútímavæðaskóla bæjarins og fjárfesta í framtíð hafnfirskra skólabarna,“ segir Rósa Guðbjartsdóttir, formaður fræðsluráðs í Hafnarfirði.



Sjá einnig: Viss um að þetta sé rétta leiðin



„Við vitum að reynsla annarra skóla af því að nota spjaldtölvur er góð, ekki síst við að bjóða upp á einstaklingsmiðað nám. Stefnt er að því að spjaldtölvur verði teknar til notkunar í öðrum skólum bæjarins á komandi misserum á árum.“

Leifur S. Garðarsson, skólastjóri í Áslandsskóla, segir kennara hafa fengið námskeið frá utanaðkomandi fagaðilum í skólann svo og hafa verið nokkur námskeið þar sem umsjónarmaður innleiðingarinnar og kennarar kenna og miðla af reynslu sinni.

„Við höfum heimsótt aðra skóla sem hafa tekið Ipad upp við kennslu, sótt fræðslu erlendis ásamt því að Áslandsskóli er í góðu samstarfi við aðra skóla og sveitarfélög sem eru í svipuðum hugleiðingum. Þetta er frumkvöðlastarf, mikill hraði og neysla okkar á upplýsingum er mikil og auðvelt að nálgast upplýsingar," segir hann.

„Allt þetta kallar á breytta kennsluhætti, eilítið annan hugsunarhátt sem við í Áslandsskóla erum tilbúin að takast á við. Góður undirbúningur og markviss uppbygging er lykilatriði og allir hér átta sig á að þetta er ferli sem tekur tíma. Við ætlum að taka þátt í framtíðinni og víst má telja að einhver hluti grunnskólabarna í dag á eftir að vinna störf sem í dag eru kannski ekki til „ segir Leifur.