Fagna samningi við ESB sem fyrsta skref af mörgum

Samningur íslenska stjórnvalda og Evrópusambandsins opnar fyrir tollfrjálsan innflutning á alls kyns villibráð. Innflutt hreindýrakjöt, dádýrskjöt, rjúpur, dúfur, fasanar og önnur villibráð verður því tollfrjáls varningur með öllu.

Ólafur Friðriksson, skrifstofustjóri í atvinnuvegaráðuneytinu, segir þennan samning hafa bæði jákvæð áhrif á neytendur á Íslandi sem og útflytjendur íslenskra landbúnaðarafurða. „Það sem við fáum út úr þessum samningum er að þeir eru algjörlega gagnkvæmir. Allt sem við megum flytja inn tollfrjálst getum við flutt út einnig án tolla. Því opnast mikil tækifæri fyrir íslenska framleiðendur á alls kyns matvælum, svo sem svínakjöti, sælgæti og öðru. Einnig felur þessi samningur í sér að við stækkum tollkvóta á kjöti og ostum gríðarlega,“ segir Ólafur.

Tollur á franskar kartöflur lækkar um 40 prósent og ís lækkar úr 30 prósentum niður átján. Einnig lækkar svokallaður magntollur, sem er greiddur á hvert kíló af ís, úr 110 krónum í 66. Mesta lækkun á vörum mun vera á mikið unninni matvöru, svo sem kexi, pitsum, pasta, súkkulaði og þess lags vörum. Einnig hafa tollkvótar verið rýmkaðir nokkuð á landbúnaðarafurðir og verða þeir rýmkaðir í þrepum allt til ársins 2020. Gert er ráð fyrir að rýmka kvóta á innflutt nautakjöt um nærri 700 prósent frá því sem nú er og svínakjötstolla um 250 prósent. Innflutningstollar á alifugla fimmfaldast á næstu fimm árum.

Ólafur Stephensen, framkvæmdastjóri Félags atvinnurekenda, fagnar afnámi tolla á ýmsar vörutegundir. „Almennt talað eru beinar tollalækkanir eða afnám tolla hagstæðari fyrir neytendur en skömmtunarkerfi á borð við tollfrjálsa innflutningskvóta. Þegar almennir tollar eru lækkaðir eða afnumdir geta neytendur gengið að því vísu að það kemur fram í vöruverðinu. Það ber því að fagna því að afnumdir eru tollar á unnum vörum eins og pitsum, bökum, pasta og bökunarvörum, villibráð og fleiru slíku,“ segir Ólafur en bendir á að kvótaumhverfið standi enn heilbrigðri samkeppni aðila fyrir þrifum. „Þótt tollkvótarnir stækki myndarlega til ársins 2020 eru þeir samt áfram tiltölulega lágt hlutfall innanlandsneyslu eins og hún var á árunum 2011-2013. Árið 2020 verða þessi hlutföll væntanlega lægri af því að innanlandsneyslan fer hraðvaxandi, meðal annars vegna fjölgunar ferðamanna. Þetta er gríðarlega jákvætt skref, en hvað kjötið og ostana varðar er íslenskur landbúnaður samt bara að fá mjög takmarkaða samkeppni.“

Finnur Árnason, forstjóri Haga, fagnar þessum samningum stjórnvalda. „Þetta eru almennt frábærar fréttir fyrir neytendur og þessu framtaki stjórnvalda ber að fagna. Það er ekki spurning. Við hefðum þó viljað sjá stærri skref  tekin en þetta skref er þó í rétta átt og sem fyrsta skref getum við ekki annað en verið sáttir. Þetta er ein mesta kjarabót fyrir landsmenn sem við finnum því af þessu hlýst tvöfaldur ávinningur. Bæði mun nauðsynjavara lækka í verði sem og að margar af þessum vörum eru inni í vísitölu neysluverðs og lækkun þar mun hafa áhrif á lán landsmanna.“