Töldu skemmdarverk í Skemmtigarðinum í lagi vegna skattgreiðslna foreldra sinna

„Maður hugsar bara hlýlega til þeirra sem eru að stunda þessi skemmdarverk. Þeim hlýtur að líða illa,“ segir Eyþór Guðjónsson, eigandi Skemmtigarðsins í Grafarvogi en ungur drengur varð fyrir þeirri óskemmtilegu lífsreynslu í fyrradag að stíga á nagla sem lá á jörðinni vegna skemmdarverka sem unnin voru á leikmyndum Skemmtigarðsins. Krakkar sem gripnir voru glóðvolgir við skemmdarverk í síðustu viku töldu það í lagi vegna skattgreiðslna foreldra sinna.

Eyþór segir að skemmdarverkin séu nokkuð tíð og gerist stundum daglega. Þarna sé um að ræða krakka sem komi á svæðið og brjóti og skemmi leikmyndir. Svæðið sé hinsvegar mjög stórt og ógerlegt fyrir starfsmenn að vakta allt svæðið en mikill tími fari í að hreinsa upp eftir skemmdarverkin. Þó sé verið að leggja lokahönd á öryggiskerfi sem ætti að draga úr skemmdarverkum.

„Í gegnum tíðina höfum við orðið fyrir ansi miklu tjóni. Stundum er þetta að gerast daglega. Svæðið hjá okkur er frekar stórt og það er erfitt að halda uppi eftirliti á því öllu. Það stendur þó til bóta því við höfum verið að leggja marga kílómetra af lögnum til þess að koma upp öryggismyndavélakerfi. Við erum með fullt af leikmyndum sem eru notaðar fyrir laser-tag og litbolta. Slysið átti sér stað þar. Þeir sem eru að skemma þetta koma þarna og brjóta og bramla það sem er þarna. Það er mjög mikil vinna sem fer í að hreinsa þetta upp.“

Gripu hóp drengja glóðvolga við skemmdarverkin

Eyþór segir að starfsmenn hafi gripið hóp af drengjum glóðvolga við skemmdarverk í síðustu viku. Hafi drengirnir talið að skemmdarverkin hafi verið í fínu lagi þar sem þeir héldu því fram að skattpeningar foreldra þeirra færu í það að byggja upp Skemmtigarðinn.

„Við spurðum þá hreinlega hvað þeim gengi til með þessu og í fyrstu fannst þeim þetta nú bara allt í lagi. Þeir héldu einhverja hluta vegna að skattpeningar foreldra þeirra færu í að byggja upp Skemmtigarðinn. Þegar ég sagði þeim að það væri nú ekki þannig, Skemmtigarðurinn væri í eign fjölskyldu minnar og það væri okkar peningar sem færu í að byggja þetta upp þá sáu þeir að sér, skömmuðust sín mjög mikið og báðust afsökunar. Það eru þó kannski ekki allir þannig, sumir skammast sín ekki neitt og halda bara áfram að skemma.“

Fjölskylda drengsins unga sem fékk nagla í gegnum skóinn var mjög ánægð með viðbrögð starfsfólks Skemmtigarðsins þegar kom í ljós hvað hafði gerst. Eyþór segir að það sé mikilvægt að hafa öryggið í lagi og að starfsfólkið hjálopi öllum, hvort sem þeir séu viðskiptavinir eða ekki. Það sé einnig mikilvægt að sýna kærleika gagnvart þeim sem vilji rífa niður.

„Við erum bara þjónustufyrirtæki og við hjálpum bara til eins og við getum þegar svona kemur upp á. Sem betur fer eru slysin hjá okkur mjög sjaldgæf. Við pössum okkur upp á að öryggið sé í lagi. Þetta er opinn garður og það eru allir velkomnir hingað. Við fyrirgefum þeim bara sem eru að stunda svona og einbeitum okkur að því byggja upp jákvæða starfsemi eins og við höfum verið að gera.“